雖然移民泰國好似好偏門咁，但其實近年有興趣移民東南亞嘅港人，都會將泰國呢個地方納入考慮之內，除咗因為文化類近、樓價低，更因為移居泰國嘅方法相對比其他地方多，而移居泰國嘅第一步，就係申領「非移民簽證」，透過各類簽證申請長期居留泰國，取得永居身份後，最後再申請入籍。 泰國嘅「非移民簽證」多達十幾種，當中最多人選用嘅就係投資簽證、工作及商務簽證、精英簽證、智慧簽證、養老簽證、親屬簽證及學生簽證。
1. 投資簽證（Investment Visa）
申請人可以透過投資《投資委員會（Thailand Board of Investment，BOI）手冊》核准嘅投資項目（BOI 項目），又或者係購買泰國公寓、泰國政府債券，甚至直接存入現金至泰國銀行戶口，混合幾種投資項目都得㗎！總之金額達1,000萬泰銖（約220萬港元）就可以獲得為期一年嘅投資簽證，之後可以無限期每年續簽。值得注意嘅係，大部分國家嘅投資簽證係唔接受購入房地產作為投資項目，但泰國係容許㗎，同時為咗鼓勵泰國樓市發展，當地買樓稅務極低，買家只需要支付樓價 百分之一嘅樓宇交易稅，以及500泰銖嘅印花稅，可算係抵中之抵！
2）工作及商務簽證（NON-IMMIGRANT-B）
呢個係最容易申請嘅移居泰國簽證，可以選擇單次入境、有效期為三個月嘅簽證，又或者係另一種，可以多次入境、有效期最多為一年嘅簽證。同時設有個人簽證及家庭簽證，申請人可以為配偶、20 歲以下未婚子女及父母申請，逗留時間最多一年。申請人只要持有勞工部批准信、當地僱主合約僱傭合約及持有足夠資金（個人簽證最少要有20,000泰銖，家庭簽證最少要有40,000泰銖）就可以申請。
3）精英簽證（Elite Visa）
如果您係經常要到泰國公幹，甚至只係純粹鍾意泰國嘅生活，希望可以長居泰國，並享受最尊貴嘅待遇，呢個精英簽證就最適合您喇。佢嘅概念就好似一個俱樂部咁，透過購買會籍，可以得到最多長達20年嘅長期居留簽證。「精英簽證 」Thailand Elite Visa又稱 Privilege Card，係2003年泰國旅遊局成立嘅一間名爲泰國特權卡有限公司所設計嘅國家會員項目，目的係希望吸引以高資產淨值人士重覆到訪泰國。簽證費用由60萬泰銖（約13萬港元）起跳，分五年、十年及二十年三個有效期，每五年續簽，同時申請人可以以優惠價為家屬申請會籍。憑Thailand Elite不但可以喺有效期內無限次進出泰國，更可以喺泰國境內享受多種休閑生活及交通出行上嘅特級待遇。
4）智慧簽證（SMART Visa）
亦即係人才簽證，目的係吸引各國專才到泰國發展。 申請類別分為四類：
4A）Talent 專業人士（Category T：Talent） - 屬科學或科技專才 - 獲得最少一年嘅工作合約 - 月薪需達10萬泰銖 *若僱主為初創公司，或者申請人係已退休嘅科技專家，則只需5萬泰銖
4B）Investor 投資人士（Category I：Investors） - 工作業務需經政府部門認可為技術型生產或服務，並屬於 BOI 目標行業 - 於 BOI 目標行業中投資至少2,000萬泰銖（約440萬港元） *若投資對象為初創公司，投資金額只需500萬泰銖，逗留泰國期間需要一直維持投資金額
4C）行政人員（Category E：Executives） - 持大學學士或以上學歷 - 有十年相關工作經驗 - 月薪達20萬泰銖 - 工作業務須經政府部門審定為技術型生產或服務性質，並屬高級行政層 - 屬於 BOI 目標行業
4D）初創企業家（Category S：Startup） - 泰國銀行帳戶至少擁有60萬泰銖存款，並至少維持三個月 *如果有配偶或子女同行，每人至少需持有18萬泰銖存款，並至少維持三個月 - 有醫療保險 - 參與認可嘅Incubation或Accelerator 項目 - 獲政府認可或設立合資公司 - 一年內設立公司並持有至少25%所有權或成為 BOI 目標行業公司之董事
無論係以上邊個類別，SMART Visa有效期最短為兩年、最長達四年，視乎所屬類別及從事行業。雖然呢個簽證要滿足嘅條件較多，但一般簽證持有人每90日必須去移民局報到一次，而持有SMART Visa嘅話，就可以慳返啲時間，一年報到一次就夠喇。
5）養老簽證（Non-Immigrant O-A） 只要年滿50歲、銀行存款金額不少於80萬泰銖、身體健康（無患痲瘋病、結核病、象皮病、藥物成癮、第三期梅毒），就可以申請呢個簽證。主要限制係簽證期間只可以做僱主創造就業機會，但唔可以受聘於其他公司。雖然養老簽證有效期為一年，但可以無限續證㗎。
6）親屬簽證（Non-Immigrant O） 如果您係泰國國民或居民嘅直系親屬，即配偶、20歲以下嘅子女及父母，就可以考慮申請親屬簽證，有效期為三個月，可續簽一年。
7）學生簽證 (Non-Immigrant ED) 要去泰國讀書嘅話就當然可以申請簽證啦！ 如果申請人係屬於基礎教育水平（小學、中學），就需要準備以下文件： - 學校註冊文件 - 身份證或護照副本 - 學校註冊證及教育部批准函
如果申請人係屬於高等教育水平（大學、學院） - 學校註冊文件 - 身份證或護照副本 - 大學註冊證書 - 教育水平學歷證書
申請人入境泰國後，需每三個月去移民局續簽一次，每次三個月，有效期為一年。
心水清嘅您睇到呢到，可能都會見到今次高生所講嘅係「移居泰國」而唔係「移民泰國」，其實係因為要留居泰國嘅方法有好多，但要行到最後一步，申請永久居留權、甚至入藉泰國並唔容易。首先，申請人需要持有非移民簽證達三年或以上，然後向泰國移民局申請永久居留簽證，通過面試及筆試後，會取得藍色嘅Residence Book，之後申請人要到Amphur作住址登記，喺取得 House Card後就要到泰國警察局申請紅色嘅Alien Book（即係泰國身分證），每年都需要重新註冊，十年後先可以申請入籍，正式移民泰國成為泰國公民。
想知道更多關於搬屋/搬Office嘅資訊？記得留意我哋嘅Facebook同Instagram啦！ ------- 高永搬屋官方網站：http://bit.ly/32HNqeO 高永搬屋instagram：http://bit.ly/2V0dlwx 線上報價/查詢：http://bit.ly/goingmoving / +852 5595 7455 (Whatsapp)
Comments