技術移民嘅概念有啲似工作簽證，係各種移民方法入面比較實在同有安全感嘅，基本上只要係喺某方面有專業技術能力，又或者係有僱主擔保，就可以從技術移民呢個途徑為入籍鋪路。今日高生就整理咗六大技術移民熱點，包括台灣、澳洲、愛爾蘭、美國、日本同英國，一齊嚟睇睇有咩注意事項啦！
台灣技術移民
呢個途徑係為具備專業能力並已取香港政府認可證書嘅港人而設，申請人只要符合台灣指定嘅專業人士要求，並滿足在台連續居住日數，就有資格申請，唔需要僱主擔保㗎。
申請者自身要求（四選一）
- 喺特殊領域之應用工程技術上有成就者，即是對新興工業、關鍵技術、關鍵零組件及產品有專業技能，並具有五年以上廠務或研究發展之實務經驗，且擔任相當於經理以上職務等標準。
- 具有專業技術能力，並已取得香港或澳門政府之執業證書者，包括：律師、會計師、技師、建築師及醫事人，並需要執行該職務二年以上。
- 在學術、科學、 文化、新聞、金融、保險、證券、 期貨、運輸、郵政、電信、氣象或觀光專業領域有特殊成就者。
- 依公司法設立之公司、經認許之外國公司、或經備案之外國公司代表人辦事處聘僱之主管或專門性及技術性人員，如取得國內外大學相關系所之碩士以上學位者，或取得相關系所學士學位而有二年以上相關工作經驗者等。
以上四種類別有唔同嘅審核標準，詳情可以睇返香港澳門專業人士申請在臺灣地區居留資格審核表。
澳洲技術移民
澳洲政府每年都會為各州及領地提供技術移民配額數量，然後各州就會根據配額發出簽證擔保。喺今年三月當地就公布咗澳洲聯邦財政預算案，喺移民政策方面，2022-23年嘅永久居民配額為16萬個，技術類及家庭類移民配額比例約為2:1，而技術類移民配額更比以往多約3萬個（即增加到109,900個），只要使用佢哋嘅計分系統SkillSelect，並按工作經驗、資歷、英語能力及家庭組合評分，就可以知道合唔合符資格申請。由於呢個系統需要申請移民嘅時候先可以登記使用，如果唔肯定自己嘅得分，可以先用澳洲政府提供嘅簽證計分機初步計算一吓。
獨立技術簽證(189)
申請條件：
1. SkillSelect達到65分或以上，獲當局邀請後可申請簽證
2. 年齡為45歲以下
3. 職業屬中長期技術清單範圍內，並符合當局技術評估
4. IELTS 讀寫聽說達6分或以上
技術提名簽證(190)
申請條件：
1. SkillSelect達到65分或以上，獲當局邀請後可申請簽證
2. 年齡為45歲以下
3. 職業屬短期技術清單 / 中長期技術清單範圍內，並符合當局技術評估
4. IELTS 讀寫聽說達6分或以上
5. 獨得州或地區政府機構作提名人
技術工作區域（臨時）簽證(491）
申請條件：
1. 需獲州或領地政府機構提名，或由符合條件嘅親屬作擔保
2. SkillSelect達到65分或以上，獲當局邀請後可申請簽證
3. 年齡為45歲以下
4. 職業屬短期技術清單 / 中長期技術清單 / 偏遠地區技術清單內，並符合當局技術評估
5. IELTS 讀寫聽說達6分或以上
6. 由身為澳洲公民 / 永久居民，並長期居於偏遠地區嘅直系親屬或近親作擔保人；或獨得州或地區政府機構作提名人
7. 只能夠喺指定偏遠地區定居及工作，可更換僱主
8. 簽證期屆滿後唔可以續簽，只可以轉為申請其他簽證
*偏遠地區指除咗悉尼、墨爾本及布里斯本以外地區
*獲發491簽證起計三年後，就可以透過技術區域簽證(191)申請永久居留，詳情請閱【移民澳洲】一文了解澳洲避風港政策
愛爾蘭技術移民 - General Employment Permit
只要您被當地僱主錄取，就可以自行或者由僱主幫您申請工作簽證，續簽滿五年，之後滿足一定條件就可以申期長期居留或者入籍，成為當地公民。
僱主首先要通過市場勞動力需求測試（Labour Market Needs Test），證明未能夠喺愛爾蘭及歐洲經濟區國家中聘請到合適人手，同時，申請人嘅工作年薪須達€30,000歐元（約 $27.2 萬港元）。成功申請嘅話，第一次簽證有效期為兩年，期後可以續簽多三年。不過要注意嘅係，部分職業係唔可以申請工作簽證嘅，例如酒店經理、餐廳經理、地產代理經理、社工、輔導員、健身教練等，詳情請查閱愛爾蘭企業、貿易及就業部門嘅網站清單。
美國技術移民
EB-1A 傑出人才移民（Alien of Extraordinary Ability）
呢個方法屬於美國移民法規定嘅技術移民「第一優先」嘅類別，亦係配額最多嘅，佔每年全球移民簽證配額中28.6%，即係大約4萬個移民簽證。對象係喺科學、藝術、教育、商業或體育等領域中具有特殊才能、取得成就，並享有國家級或國際性聲譽，而且成果同貢獻都係喺該領域得到廣泛認可嘅傑出專業人才。申請人喺獲得綠卡後需要喺美國繼續從事其領域內嘅工作，並且透過呢份工作對美國社會相關發展提供實質貢獻。為咗吸引全球傑出人才去美國發展，所以不設英語水平、學歷及年齡限制，只要一人申請成功，其餘家人（配偶及21歲以下子女）都可以一同獲得綠卡。
申請條件：
喺該專業領域內，申請人能夠滿足以下十條申請條件中至少三條：
1. 學士學歷及十年以上相關工作經驗／碩士學歷及五年以上相關工作經驗／博士學歷
2. 執業許可證或專業證書
3. 高薪證明
4. 至少兩個行業協會會員
5. 行業領域獲獎
6. 主流媒體個人專訪
7. 期刊評審、賽事評委、會議發言嘉賓經驗
8. 原創性貢獻（專利、行業標準、科研項目）
9. 國家學術性期刊發表論文至少五篇以上
10. 企業或機構中擔任重要職務
EB-2 "高學位或特殊人才” 國家利益豁免 NIW（National Interest Waiver）
呢個方法屬於美國移民法規定嘅技術移民「第二優先」嘅類別，對象係擁有高學位或者擁有特殊才能，但未能符合申請EB-1A條件嘅人士。國家利益豁免意思係基於國家利益考慮，請求移民局豁免對申請者嘅勞工證要求，亦因為咁佢係屬於EB-2嘅一種，只不過申請人唔需要辦理勞工證，就算冇美國僱主擔保都可以申請。專業領域包括科學、藝術、商業三類，申請人同樣要證明自己喺從事嘅領域係相當出色，亦會對國家產生全國性嘅利益。
申請條件：
第一類）高學位人士
1. 碩士或博士學位持有者；美國學位或者等同嘅外國學位均可
2. 學士學位及至少五年專業工作經驗
第二類）科學、藝術、商業方面嘅特殊人才須滿足以下六條申請條件中至少三條：
1. 持有專業學位、文憑或培訓證書
2. 擁有至少十年專業工作經驗
3. 持有執業證書（如各類專業工程師證書）
4. 享受高薪或高酬
5. 擁有專業協會會員資格
6. 獲得同行、政府機關、專業組織或商業組織讚許或表彰
EB-3 僱主擔保移民
呢個方法即係通過建立僱傭關係，申請勞工紙到美國工作，並申請美國合法永久居住權，屬於技術移民「第三優先」嘅類別，具體再細分成三類對象：
第一類）專業人士EB-3A（Professional) ）
申請人最少要擁有美國學士學位或外國同等學歷，並且係該專業嘅成員
第二類）技術工人EB-3B（Skilled Workers）
申請人從事嘅工作需要最少兩年嘅相關工作經驗／需要兩年時間培訓
第三類）非技術工人EB-3C／EW3（Unskilled Worker）
申請人從事嘅工作唔需要最少兩年嘅相關工作經驗／唔需要兩年時間培訓
無任何學歷或技能要求，主要係體力勞動嘅工人，例如清潔工、食品加工廠、屠宰工等，唯一限制係唔可以屬於臨時性或季節性嘅工作性質
日本技術移民 - 技術．人文知識．國際業務簽證
呢項簽證簡稱為「技人國」，期限分為五年、三年、一年、半年及三個月，涵蓋多個工種，係目前最多外國人申請嘅日本工作簽證。日本當局會按照申請人及申請人任職嘅公司決定簽證限期，而持技人國簽證嘅配偶及子女就可以以家人身份申請「永住者的配偶簽證」及其他種類嘅親屬簽證留居於日本。申請人需要與日本嘅公營機構或民間企業締結與工作相關嘅合約，例如僱傭合約、派遣勞動契約或業務委託合約等，上面需註明工作內容、薪金、福利等細節，相關待遇唔可以低於日本員工擁有嘅技能及知識，換句話說，即係要證明聘請您嘅獨特性及必要性。而公司條件亦同獲批成功率成正比，規模越大、營業額越高等，簽證獲批嘅機會都越大。申請人喺日本居住滿十年以上並滿足一定條件，就可以申請永住權。
英國工作簽證 - Skilled Worker；前身為General Work Visa Tier 2
由2020年12月1日開始，英國正式實施移民政策修正案，Skilled Worker將取代Tier 2 General-Work Visa，實行靈活嘅積分制度，申請人需獲得總分至少70分以獲得簽證。
呢個可能係BNO簽證以外，最容易申請到嘅簽證方法，加上英國脫歐後，僱主毋須再證明未能聘用本地人選就可以請外地人做嘢，變相香港人成功搵工嘅機會更加大。只要您證明您係受聘於內政部批准嘅英國僱主，同時獲得工作類別中嘅最低工資／市場薪金，並符合指定工作技能及英語能力，就可以申請為期五年嘅工作簽證，五年後就可以行申請定居嘅程序。當然，如果期間有轉工或更換僱主嘅情況，一樣需要向有關部門更新資料及滿足簽證要求啦。
新積分制下共有九項評分標準：
必須條件（合計50分）：
1）獲得一份有“僱主擔保資質”企業提供嘅工作（20分）
2）符合工作技能要求（20分）
3）英語能力獲 CEFR B1級（10分）
加分條件
1）申請人的薪資等於或超過:
a. 每年$25,600 英鎊；
b. 行業薪資標準嘅崗位工資 （20分）
2）與工作崗位相關嘅博士學位，申請人薪資等於或超過：
a. 每年$23,040英鎊；
b. 崗位工資嘅90%
以上，教育資格將獲得10分，申請人薪資獲得10分
3）與工作崗位相關嘅科學、技術、工程或數學（STEM）學科博士學位，申請人薪資等於或超過：
a. 每年$20,480英鎊；
b. 崗位工資嘅80% （20分）
4）短缺工種，申請人薪資等於或超過：
a. 每年$20,480英鎊；
b. 崗位工資嘅80% （20分）
5）健康或教育行業工作，申請人薪資等於或超過：
a. 每年$20,480英鎊；
b. 符合崗位工資（20分）
6）申請人為初入職場者（如畢業生），薪資等於或超過：
a. 每年$20,480英鎊；
b. 崗位工資嘅70% （20分）
有關獲英國移民局許可、持有僱主擔保牌照並可以聘請海外員工嘅公司，可參閱： https://www.gov.uk/government/publications/register-of-licensed-sponsors-workers