政府近日公布上年2021年有14,700萬人申請俗稱「良民證」嘅「無犯罪紀錄證明書」作移民用途，比2020年急增四成，亦創下1997年回歸移民潮以嚟嘅新高，雖然申請咗良民證唔代表會成功移民，但同樣地呢個數字並未包括唔需要良民證嘅移民地方，例如英國、台灣等，所以粗略估計，移民潮的確仍然存在。
高生細個嘅時候，成日聽到電視廣告話「真正嘅快樂，係您懂得去選擇，透過景X移民…」，選擇的確好重要，但更重要嘅係要了解自己究竟需唔需要一間移民顧問公司去幫您實行您嘅移民計劃。其中，高生認為主要有兩個影響因素。
移民顧問收費
無庸置疑有人幫您辦妥移民所需文件，仲可以幫您制定移民方案、提供海外升學建議、海外就業及職前輔導，甚至係到目的地之後嘅安家服務等，真係好方便好吸引，但要明白當中牽涉到嘅費用係會視乎實際情況同所需要嘅服務收費，基本上移民顧問公司係冇絕對劃一嘅收費表㗎。另外，比較影響到價錢嘅會係申請簽證嘅複雜程度，例如投資移民、創業移民、退休移民等簽證，申請條件同程序比較繁複嘅，收費就會高啲。而如果係全家移民，後續亦需要移民顧問處理續簽同申請永居嘅事項（即係以年起跳嘅服務時間），收費就會更加貴。
移民目的地及簽證類型
特別係移民潮呢幾年，網絡上嘅資訊十分發達，不論係文字、YouTube甚至Podcast，「移民須知」、「移民分享」、「移民攻略」等都係最流行嘅話題，如果移民嘅城市唔係太偏門，相信自己處理簽證申請並唔會係一件難事。加上部分地方嘅移民申請程序透明度極高，全程都可以喺網上完成，例如加拿大同澳洲，所有技術移民簽證嘅步驟、條件、所需文件、收費、需要時間等資料都列明晒喺網站上面，仲設有計數機，申請人可以自行計算夠唔夠分數提交申請。
如果移民支出唔係您需要顧慮嘅事，移民顧問公司的確會係您嘅得力助手，您嘅功課只需要係搵一間有信譽、唔會拖症並且滿足到您需要嘅公司；但始終移民喺心理上同根本上都唔係一件短時間可以完成嘅事，人在異鄉有多個錢旁身總冇壞，如果您嘅目的地尚算熱門移民城市，不妨花啲心機同時間，親力親為去了解自己即將居住嘅地方嘅相關政策同條件，可能都會有額外嘅收穫㗎。
- 想知道更多關於搬屋/搬Office嘅資訊？記得留意我哋嘅Facebook同Instagram啦！ ------- 高永搬屋官方網站：http://bit.ly/32HNqeO 高永搬屋instagram：http://bit.ly/2V0dlwx 線上報價/查詢：http://bit.ly/goingmoving / +852 5595 7455 (Whatsapp)