日前新加坡宣布將會推出新嘅工作簽證「海外網絡和專業簽證（Overseas Networks and Expertise Pass ）」，喺2023年1月1日起就開始接受申請！新加坡人力部長陳詩龍形容呢項簽證係加強新加坡作為全球人才中心地位嘅多項舉措之一，同時亦會針對現時嘅工作簽證框架進行針對性嘅改進，以吸引技能短缺領域嘅頂尖人才及經驗豐富嘅技術專業人士到新加坡工作甚至定居。陳詩龍更表示，希望透過以上舉動，向投資者表明即使全球面對疫情、經濟及政治上嘅不穩定，新加坡都一直維持開放態度，積極爭奪全球人才，亦希望為本地人才創造良好工作條件。
海外網絡和專業簽證（Overseas Networks and Expertise Pass ）三大特點
1. 自由度高 現有嘅工作簽證（Employment Pass, EP）要求申請人從事特定工作，但新簽證持有人就可以喺新加坡同時創辦、經營及為多家公司工作；同時五年內不設居留時間限制，出入自由。
2. 簽證有效期長
現有嘅工作簽證（EP）有效期為兩至三年，新簽證為期五年；新簽證持有人仲可以擔保家屬，喺獲得同意書之後，屋企人同樣可以喺新加坡工作。
3. 申請人固定月薪較高
申請人固定月薪需要至少三萬新加坡元（約16.85萬港元）或以上，水平同現時嘅工作簽證（EP）最高月薪5%持有人相若；如果冇近期新加坡工作經歷嘅海外申請人，仲需要證明自己曾經或者將要為一家市值至少5億美元或年收入2億美元嘅公司工作。
至於未達薪金門檻嘅體育、藝術、科學和學術領域優秀候選人，就可以嘗試透過「海外網絡與專長」（Overseas Networks and Expertise，ONE）獲得長期簽證，一樣係2023年1月1日生效㗎！