【搬屋搬價】點解搬屋公司要問咁多資料?


搬屋報價

「方便提供兩邊大廈名稱嗎?」 「已經俾咗地區啦」 「搬運物品有相可以睇睇嗎?」 「唔方便,就係正常家庭嘅家私」

如果您都覺得被高生轟炸過,喺到同您講聲唔好意思先!的確有唔少人心諗,搬屋報價啫,駛唔駛又要大廈名、又要係咁影相呀?但實情係喺整個搬運嘅過程中,大至大廈搬運情況、小至家私類型,每一個細項都會影響報價,問多幾句都係想取得足夠清晰嘅資料,避免因為溝通不完整而產生誤會,我哋亦希望俾您嘅報價係最公道嘅價錢,而唔係靠估估大個數嚟單方面保障自己。了解咗我哋嘅心路歷程之後,不如就一齊重溫一吓會影響報價嘅因素啦!


大廈名稱

即使係同一個屋苑,唔同座數都可以有唔同嘅搬運情況,例如美孚新邨,部分座數係要行樓梯、推遠路,部分就可以直接泊樓梯而且有電梯直到單位。搬運過程中有冇梯級、駛唔駛平台轉電梯、距離貨車停泊位要唔要推遠路等,以上因素都會影響搬運團隊嘅對物品嘅處理方法,亦會影響整體嘅搬運時間及複雜性,整體搬運成本上嘅變化,絕對會同收費成正比。因此我哋都會待客人有兩邊大廈/村屋名稱後先會確認價錢,但亦唔需要詳細到幾樓幾室,喺確認搵我哋幫手之後,需要安排送紙箱及搬運服務先再提供完整地址,咁就唔駛擔心私隱問題喇。


搬運物品類型

以前比較流行嘅報價方式係預約上門報價,因為可以當面溝通同埋見到搬運物品嘅實物,感覺可靠啲,但隨住科技進步,基本上大家都有可以影相嘅手機,而影相就正正係可以俾我哋同上門一樣見到物品嘅真身,睇清楚每件物品嘅大小同類型,有啲客人會好仔細咁量度好晒每件家私嘅呎吋,其實咁做都冇睇一張相咁清晰,因為比起物品大小,材質及類型會更加影響報價,有經驗嘅搬屋公司絕對係可以做到一望張相,就判斷到嗰件家私正常情況下需唔需要拆裝、搬運上有冇咩特別問題要處理等。線上報價除咗比預約上門更有效率,圖文並茂咁記錄住報價嘅內容,對雙方都有一定嘅保障。


雜物數量

一般情況下客人都需要根據自己嘅雜物數量同搬屋公司提供嘅紙箱呎吋,去預計所需要搬運嘅紙箱數量,當然我哋亦都歡迎客人自行預備膠箱、紅白藍、行李箱等物料,只需要話返俾我哋知各款包裝品嘅呎吋同數量就可以。我哋絕對明白預計總會有出入,特別係執屋一定係執落先發現有太多嘢唔捨得扔、想搬埋過去新屋,所以有需要嘅話,我哋都會報埋雜物多出嘅收費,由於高永搬屋唔係逐件計公司,會分開報每箱收費嘅原意係俾多少少空間大家走盞,所以如果真係超出太多,記得記得一定要提早話我哋知啊,等安排時間同人手上可以有返足夠嘅預算。另一方面,如果客人比較忙、唔夠時間執嘢,亦可以考慮我哋嘅雜物裝箱服務,雖然會有額外收費,但真係快靚正㗎!

- 想知道更多關於搬屋/搬Office嘅資訊?記得留意我哋嘅Facebook同Instagram啦! ------- 高永搬屋官方網站:http://bit.ly/32HNqeO 高永搬屋instagram:http://bit.ly/2V0dlwx 線上報價/查詢:http://bit.ly/goingmoving / +852 5595 7455 (Whatsapp)

#高永搬屋 #GoingMoving #搬屋公司 #搬屋 #搬屋報價