top of page

【搬屋收費】貨車類型同搬屋收費有關?


搬屋貨車


當貨車泊唔到去屋企樓下,師傅就需要用板車人手咁將搬運物品推到貨車停泊地點,由於花嘅時間同人手多咗,所以一般搬屋公司都會收返推遠路嘅附加費用,相信呢個大家都會理解。但可能都會有客人話:「我冇咁多嘢搬,搵架細啲嘅車就可以泊到門口,咁咪唔駛辛苦師傅同加錢囉?」。


呢個時候,就要一齊了解一吓,搬屋公司究竟會用咩車搬屋喇,絕大部份專業嘅搬屋公司都會用5.5噸/9噸貨車,因為普遍家庭搬屋都會有家私要搬,除咗有尾板嘅貨車會令到搬運流程更暢順,亦有足夠高同闊嘅車斗,去處理大部分嘅搬運情況。加上,搬屋公司嘅工作日程好緊湊,可能客人A搬運物品數量唔多,貨Van容量已經足夠應付,但緊接嘅客人B係要用晒成架5.5噸貨車嘅容量,基於節省人手同工具調配嘅時間,我哋都係會統一使用5.5噸/9噸貨車。


有時候遇到客人剩係要搬一件細家私或者幾箱雜物,我哋都會坦白建議大家可能搵Call車公司會比較划算, 因為喺家私唔講求拆裝技術、物品數量及重量又係一個人都搬到嘅情況下,的確Call到車、有車代步就好易搞掂,不過如果您未必搬得郁,甚至係有物品需要人一齊搬運,就要留意Call車師傅願唔願意幫手喇,一來師傅有權駕駛服務以外嘅請求,二來就算肯搬都要另外收費,Call車連搬運埋單可能都要過千,效率相差遠唔在話下,價錢上同搵搬屋公司幫手未必有太大分別㗎。


相反情況,如果客人係擔心自己要搬嘅嘢太多,可唔可以要求用9噸貨車呢?的確就字眼睇,9噸一定係大過5.5噸啦,但事實上,貨車有分長、中、短陣,如果用5.5噸最長陣,而9噸用最短陣,兩部車可以話係一樣長!不過除咗長度仲要睇高度,車斗高度係視乎自己需要去造,所以計容量,5.5噸係可以大過9噸嘅(但當然9噸可以放到更重嘅嘢啦)。其實搬屋公司喺報價同安排日程嘅時候,就會預想埋客人嘅搬運情況,從而去分配邊支車隊負責邊啲工作,特別係香港樓宇密度高,貨車越大,出現停泊問題嘅機會就會越高,所以我哋會因應客人嘅實質需要去作出最合適嘅安排。


提提大家,由於我哋唔係按車數收費嘅搬屋公司,即係話無論係5.5噸車過嚟,定係9噸車,甚至係要走多過一轉車,我哋都只係會根據實際搬運物品嘅類型同數量作出報價,咁係因為喺報價嘅時候,我哋已經有清晰嘅畫面預計到您需要點樣嘅搬運方案,並唔會臨場因為貨車空間不足而再加收走多轉車嘅費用;同樣地,即使您只係需要同一個屋苑A座去B座,但因為師傅同搬運工具會係跟車過嚟完成搬運嘅工作,所以就算搬運物品唔駛上車都好,我哋都係要「出車」,雖然唔會有出車費,但停車場費用就會實報實銷喇,希望大家理解!

- 想知道更多關於搬屋/搬Office嘅資訊?記得留意我哋嘅Facebook同Instagram啦! ------- 高永搬屋官方網站:http://bit.ly/32HNqeO 高永搬屋instagram:http://bit.ly/2V0dlwx 線上報價/查詢:http://bit.ly/goingmoving / +852 5595 7455 (Whatsapp)



bottom of page