【投資移民】四大投資移民熱點


投資移民

投資移民一直都係較為簡單滿足到申請條件嘅移民方法,通俗啲講,只要有一定資金,再符合每年居住日數要求,就可以透過投資移民呢個方式獲得簽證再取得居留權。除咗早前講過,英國暫時停止接受投資移民嘅申請,高生就整合咗另外四大投資移民熱點,包括台灣、日本、愛爾蘭、美國,跟住落嚟就一齊重溫一吓各個地方嘅申請條件同最低投資要求啦!


台灣投資移民

喺今年三月,台灣經濟部投審會提高咗申請門檻,要求包括: - 由代理人撰寫及向台灣經濟部投資審議委員會提交投資居留計劃書,並獲得審批 - 需要喺台灣投資600萬新台幣(約HK$155萬)以上(喺台灣買樓係唔計入投資範圍) - 開設有實際業務嘅公司或投資現有台灣公司(特許經營都可以) - 須營運投資企業至少三年,並委託合資格會計師核數 - 聘用2名以上台籍員工 - 在台連續居住滿一年(年內出境少於30日);或 - 連續居留滿 2 年,每年居住 270 日


日本投資移民 - 經營管理簽證

其實日本係冇開設正式嘅投資移民計劃嘅,唯一一個有投資成份嘅途徑,就係「經營管理簽證」,只要申請人喺日本成立及經營管理一間規模相當於上市公司嘅企業就可以。有意透過呢個途徑移居日本嘅申請者,可以先申請「經營管理簽證(4個月)」前往日本,辦理公司註冊手續,等公司成立之後,再將經營管理簽證更新為一年;如果係打算以東京為公司根據地,就可以直接申請「東京都創業人才引進簽證(6個月)」,外國投資者可以親自前往東京創業,係開設公司最快嘅方式。申請人需年滿20歲或以上、公司僱用兩名以上員工、投資金額達500萬日圓(包括於日本創業/收購日本公司/擔任日本公司社長) 及喺日本有明確固定嘅公司地址。每次簽證期為一年,只要申請人冇不良記錄、公司運營正常及收入可支持留日生活,就可以繼續續簽。


愛爾蘭投資移民 - Immigrant Investor Programme ,IIP

申請人只要年滿18歲,資產淨值達€200萬歐元(約$1,800萬港元),再投資€100萬歐元於當地認可企業或投資項目;或投資€200萬歐元於當地房託,並持有以上項目投資達三年,就可以IIP申請移民愛爾蘭。申請人無須通過語言學歷要求,只須要每年入境及居住喺愛爾蘭一日就可以。最快六個月就可以知道申請結果,而未批核申請前亦無須進行投資。

現時仲有另一種投資移民途徑,就係捐款至藝術、體育、健康、文化或教育領域嘅愛爾蘭公益項目中,如果申請人係以個人名義捐款,金額需達€50萬歐元;企業名義則需達€100萬歐元;如果係以一組五人嘅方式一齊捐款,每人捐€40萬歐元就可以達到捐款要求。呢個係被視為最簡單直接嘅投資方式,免去資金最短投資期三年嘅要求,不過就冇投資回報,而且項目名額有限,需要多加留意。


不過自從俄羅斯及烏克蘭衝突後,歐盟各國嘅投資移民政策都受到衝擊,同時歐盟開始對過去接受咗好多俄羅斯投資客嘅移民項目施加壓力,加上歐盟本身一直對黃金簽證項目以及歐盟護照項目過分輕易獲批有所不滿,以上種種,有傳今年七月愛爾蘭嘅投資移民政策都會宣布收緊,不過呢啲都係未經證實嘅消息,而如果您係有意透過呢個方式移民愛爾蘭嘅,目前都係未受影響嘅。


美國投資移民 - EB-5 投資移民(Direct Investment)

呢個方法每年會獲派一萬個名額,要注意嘅係,計劃只接受直接投資,而唔係通過中介進行投資。美國嘅投資移民比其他地方嘅門檻低,無一定嘅英語要求,亦無須投資或經營企業嘅經驗,同時只要每半年入境一次就可以,最重要嘅係,同傑出人材移民一樣,只要一人申請成功,其餘家人(配偶及21歲以下子女)都可以一同獲得綠卡,變相係只要五十萬美元,就可以為全家辦理綠卡。


美國EB-5 申請條件: 1. 申請人需要喺美國進行投資或於高失業率嘅地方中心投入至少五十萬美元 2. 不限於新創企業或購買現有企業嘅股份 3. 可選擇成為一個共享企業嘅合作夥伴(Franchise模式) 4. 申請人必須為直接投資人,同時參與基本管理與監督 5. 該企業必須創造至少十個就業機會

-

想知道更多關於搬屋/搬Office嘅資訊?記得留意我哋嘅Facebook同Instagram啦!

-------

高永搬屋官方網站:http://bit.ly/32HNqeO

高永搬屋instagram:http://bit.ly/2V0dlwx

線上報價/查詢:http://bit.ly/goingmoving / +852 5595 7455 (Whatsapp)

#高永搬屋 #GoingMoving #搬屋公司 #搬運公司 #搬屋 #搬寫字樓 #移民 #移民搬屋 #空運 #海運 #船運 #國際搬運 #報關清關 #搬運 #二手家私 #存倉 #搬屋報價 #免費上門報價 #即時報價 #線上報價 #投資移民