【寵物移民】帶主子移民五大重點


寵物移民

過去三個月,高生同大家分享咗唔同熱門及新興地點嘅移民政策,手續上可能都只係一份表格、一張機票、一本證件嘅事,但如果係毛孩家長嘅您,更加會多咗一份責任,今日我哋就會一齊了解吓寵物移民嘅條件同準備事項,等大家即使要離開香港,都可以一家人齊齊整整開展新生活。


寵物移民小百科:寵物身體狀況

喺準備任何嘢之前,最重要嘅一定係要先判斷您嘅寵物適唔適合移民,亦即係寵物本身身體條件許唔許可。如果您嘅寵物係比較年長、患有心臟病、容易精神焦慮、癡肥甚至係長期病患需要長期服用藥物等等嘅話,由於飛行途中唔會有空中服務人員可以餵飼藥物,加上環境陌生、活動空間有限,長途飛行對寵物嚟講有一定嘅壓力同風險。


寵物移民小百科:寵物入境資格

唔同地方有唔同嘅動物入口規定,例如攜帶寵物嘅數量、年齡、品種、懷孕狀況等方面都有特定嘅要求。就好似英國規定唔可以攜帶超過五隻寵物入境、比特鬥牛犬(Pit Bull Terrier)、土佐鬥犬(Tosa)、巴西菲勒獒犬(Fila brasileiro)等犬隻種類係唔可以入境嘅。而一般合資格品種,大部分地方都會要求寵物健康證明及特別許可證、體內已植入晶片、已注射預防針及疫苗等,由於各個地方對各項細節都有唔一樣嘅標準,建議主人及早了解清楚當地寵物移民嘅政策,以免因為唔符合規定而被拒絕入境或產生寵物隔離時間。順帶一提,正常情況下只要主人為寵物辦妥移民手續及所需證件,毛孩係唔需要坐「移民監」嘅,好似美國、加拿大、英國及新加坡等,寵物入境後都係唔需要接受隔離㗎。


寵物移民小百科:寵物移民所需時間

唔同地方需要辦理嘅手續不一,預留三個月至九個月準備最為理想,以台灣為例,如果您嘅寵物係狗狗,就需要喺入境前180日至一年幫佢注射瘋狗針及驗血,取得狂犬病血液抗體報告後就可以網上申請入境,而到達台灣後亦需要隔離7日,總共需時大約七個月。


寵物移民小百科:寵物運送方式

主要分為托運及乘坐貨機兩種。托運即係寵物以托運行李方式登機,同主人乘坐同一班飛機抵達目的地;而坐貨機即係寵物分開以貨物形式,坐貨機前往目的地。某啲情況下,部分航空公司會接受小型寵物跟隨主人乘坐客艙,不過當然需要有合規格嘅運輸容器,例如航空袋、航空籠等啦。其實無論係寄艙托運定係貨運,寵物都需要使用航空籠運送,而每間航空公司對航空籠都有唔同嘅要求,一般嚟講,航空籠要俾寵物有足夠空間喺籠內站立、轉身及瞓低,同時需要通風、堅固及鋪設防漏層,但唔係大就好㗎,因為唔係每間航空公司都接受大型嘅寵物籠,亦有航空公司會因應寵物籠嘅大小而收取額外費用,所以最好就係喺購買寵物籠之前,同航空公司確認咗先。


寵物移民小百科:寵物移民費用

由於寵物移民比起本人移民更加繁複,亦因為每個地方入境政策都有大大小小嘅分別,網上唔會有太詳盡嘅資料,所以有唔少主人都會尋求寵物移民公司幫助。大部分寵物移民公司會包辦機票、文件、手續等一個大數去報價,最保守估計都需要五位數。當中,喺接受報價前,除咗貨比三家,有啲地方可以特別留意以免超出預算,例如唔同寵物運送嘅方式,以寄艙形式託運及坐貨機單獨託運,價錢必定有出入,主人應先考慮邊種方式最適合自己嘅寵物,再因應情況了解寵物移民公司嘅報價係唔係包括咗您需要嘅服務。


想知道更多關於搬屋/搬Office嘅資訊?記得留意我哋嘅Facebook同Instagram啦! ------- 高永搬屋官方網站:http://bit.ly/32HNqeO 高永搬屋instagram:http://bit.ly/2V0dlwx 線上報價/查詢:http://bit.ly/goingmoving / +852 5595 7455 (Whatsapp)

#高永搬屋 #GoingMoving #搬屋公司 #搬運公司 #搬屋 #搬寫字樓 #移民 #移民搬屋 #空運 #海運 #船運 #國際搬運 #報關清關 #搬運