上星期同大家初步了解過寵物移民嘅基本概念，今日就會用移民英國做例子，一齊睇睇如果要同主子一齊移民嘅話，有咩條件同手續嘅呢？
寵物移民小百科：寵物入境英國資格
1. 微芯片（晶片） 寵物要入境英國，就必須要由合資格人士幫寵物植入晶片以辨識身份，AVID及ISO兩種都係合符資格嘅，但唔係每個英國機場都有可以讀取AVID嘅晶片機，所以ISO晶片會比較保險，而如果係植入ISO，就需要符合國際標準化組織（ISO）標準 ISO 11784及ISO 11785，如果唔符合的話，主人需要自行準備寵物嘅微芯片閱讀器，避免出現讀取唔到晶片嘅情況。
2. 寵物護照及健康證明 完成植入晶片後，就可以為寵物注射疫苗，由於寵物至少達12周大先可以接種疫苗，換句話說，要符合英國寵物移民條件，您嘅寵物年齡唔可以細過12周。狂犬病疫苗係必須要接種嘅疫苗，喺寵物接種三十日後，需要再為寵物採集血樣，您嘅獸醫必須將血液樣本送到歐盟批准嘅血液檢測實驗室，並證明疫苗接種成功（狂犬病抗體水平至少為0.5 IU/ml），而喺採集血樣日起計，主人必須等三個月後先可以起行。
而如果您嘅寵物係狗狗，就需要喺入境英國24小時前、120小時內接受絛蟲治療（含有吡喹酮Echinococcus multilocularis tapeworm 或證明對多房棘球絛蟲有效的等效物），並記錄喺寵物護照或健康證明內。疫苗接種記錄上必須顯示寵物嘅資料，包括出生日期、微芯片編號、放入或讀取日期以及喺寵物身上嘅位置；另外就係疫苗分別接種嘅日期、疫苗製造商、產品名稱、疫苗批號、接種有效期及負責獸醫嘅簽名仲有聯繫方式。
除此之外，主人需要攜同寵物、疫苗接種紀錄等資料到香港獸醫診所，取得獸醫發出嘅寵物護照，護照上會清楚列明主人資料、獸醫資料、寵物晶片資料、寵物嘅特徵或識別、狂犬病疫苗注射記錄、狂犬病驗血記錄、條蟲治療記錄等，只有滿足入境要求，護照先會有效。特別要注意嘅係，寵物必須喺寵物健康證明簽發後十日內、及與主人到達英國嘅時間差距不多於（早過／遲過）五日入境，同時主人亦需要填寫一份聲明，承諾唔會出售或轉讓寵物嘅所有權。
寵物上機離開香港嘅時候，亦需要持有獸醫及香港漁農自然護理署簽發或加簽嘅動物健康證書，證明寵物嘅健康狀況足以應付機程，所以為咗寵物健康及滿足移民條件，主人應該喺出發前五日（狗狗）或十日（貓貓）內攜同寵物到獸醫診所檢查，然後再向漁護署辦理健康證書。
寵物移民小百科：寵物直航英國服務供應商
目前只有國泰航空（Cathay Pacific）及英國航空（British Airway；由姊姊公司 IAG Cargo負責）有寵物直航前往英國嘅服務，主人喺預訂機票之後，首先要同航空公司聯絡有關申請寵物機位事宜，之後航空公司就會提供一個臨時空運提單號碼（Airwaybill Number）俾您，然後通過聯絡該航空公司喺抵達目的地後負責清關嘅公司，取得清關服務確認編號之後，再用呢個編號向航空公司訂購貨位。要留意嘅係，同一般貨運一樣，主人都係需要提前向英國稅務海關總署（HMRC）申請轉移居留（Transfer of Residence, ToR），證明寵物係跟住主人移民而唔係一件貨品，如果唔係喺入境嘅時候就會被徵收稅項㗎喇。
寵物移民小百科：出發英國當日準備事項
喺上機當日，主人記得要同寵物提早4-6個鐘到達機場貨運站呀，因為寵物要面對嘅程序仲有好多，例如要連同機艙籠一齊照X-Ray、磅重、遞交文件等，由於路途遙遠，航空公司職員只會喺有需要嘅時候為有水樽裝置嘅寵物加水，所以如果您嘅寵物比較活潑，最好就用索帶綁好水樽喇。籠入面可以放少少食物或者零食安撫毛孩，亦可以放少少主人嘅衣物或寵物用開嘅毛氈及小玩具，令寵物有安全感啲。
疫情期間可能寵物移民嘅政策有變動，有需要都係做多啲功課瀏覽有關網頁或向專業人士尋求協助啦！
英國寵物旅遊官方網站 Pet Travel Scheme
國泰航空攜帶寵物外遊網站
英國航空攜帶寵物外遊網站 Travelling with pets
想知道更多關於搬屋/搬Office嘅資訊？記得留意我哋嘅Facebook同Instagram啦！ ------- 高永搬屋官方網站：http://bit.ly/32HNqeO 高永搬屋instagram：http://bit.ly/2V0dlwx 線上報價/查詢：http://bit.ly/goingmoving / +852 5595 7455 (Whatsapp)