移民選擇邊個城市、小鎮定居確實唔係一件容易決定嘅事，雖然網上面有好多「最多港人居住嘅城市」、「治安最好嘅小鎮」等等嘅排行榜，但邊個落腳點「對您」最好，真係只有您自己先知道。今日高生就搵咗五個呢幾年都Keep住好多人查詢嘅城市，簡單咁為大家介紹一下佢哋各有啲咩突出嘅表現，想知道更多資料就要靠自己努力做功課喇！
五大移民英國城市－校網強大的曼徹斯特（Manchester）
Manchester位於英國北部，總人口大約有51萬人，因為係全世界最早出現嘅大工業城市，成為咗英國其中一個重要嘅交通樞紐，同時集金融、商業及文化於一身，唔少國際知名嘅大企業都選擇喺呢個城市札根，例如Amazon、Microsoft及英國最大嘅網上招聘平台Indeed.com。當中，Altrincham及Sale兩個小鎮更曾被選為最受英國人歡迎嘅定居地。Altrincham出名係名校區，Manchester總共有七間Grammar Schools，而呢區佔咗三間，其中兩間更加係全英國西北區排頭兩名嘅公立學校；Sale就出名交通方便，乘搭Metrolink（類似香港嘅輕鐵）只需20分鐘就出到去市中心，去曼徹斯特國際機場亦只需15分鐘，校網方面都唔差，計埋Altrincham，兩個小鎮總共有14間被評為「Outstanding」（類似Band1嘅意思）嘅中小學，十足十香港嘅九龍塘區。除此之外，另一個吸引點係，兩個城市嘅犯罪率，特別係偷竊同爆竊案，都比全英國西北部低，不過亦因為競爭力出眾，樓價同租金當然就會相對地高啦。
五大移民英國城市－環境清幽的肯特郡（Kent）
Kent位於英國東南部，啱啱好同Manchester有強烈嘅對比，Kent人口密度低，生活節奏慢，有「英格蘭後花園」之稱，距離倫敦約40-60分鐘車程，同時教育資源亦十分豐富，除咗係英國本地數一數二嘅名牌私立寄宿學校集中地，亦係全英國三個Grammar School最密集嘅地區之一（其餘兩個係倫敦London及伯明翰Birmingham)，其中，以中等教育普通證書（General Certificate of Secondary Education, GCSE）選修嘅八門科目平均分計算，英格蘭所有公立學校學生平均分為46.7，而以Kent成績排名最高嘅10間公立學校計算，平均分為69.7至76，師資不容忽視。樓價及租金方面較為實惠，大約7000蚊港幣已經可以租到好靚嘅地方，有300萬預算嘅仲可以買到House！
五大移民英國城市－發展潛力高的伯明翰（Birmingham）
Birmingham位於英國中部，距離London再遠少少，大約要2小時火車車程（不過2026年高速鐵路HS2落成後，時間就會縮短到約50分鐘！），以服務業、金融業為主要產業，而喺2010年Birmingham推行咗「大城市規劃（Big City Plan）」後，各方面嘅實力都不斷提升。計劃本身目的係喺20年內打造成全球最宜居城市首20名之一，其中嘅發展藍圖，包括發展新商業金融區、每年為經濟貢獻21億英鎊、發展其他高鐵線、擴建地鐵路和機場等，總投資額達到100億英鎊，過程中吸引咗唔少跨國企業投資，效益反映咗喺過去10年，城市人口增長高達30萬，其中40%為25歲以下嘅年輕人。有趣嘅係，喺房屋需求急升嘅情況下，當地樓價喺過去五年增長咗33%，但都只係第一大城市London嘅三分之一，雖然有分析預計未來幾年嘅住宅價格，每年會有4%或以上增長，但相信都係一個唔錯嘅投資選擇。
五大移民英國城市－就業崗位多的雷丁（Reading）
Reading位於英國中南部，如果坐Elizabeth Line，由Reading火車站出發最快只需23分鐘就可直達London市中心嘅Paddington車站（兩邊車站已經通車），呢條以英女王命名嘅「橫貫鐵路」將於2023年完工，到時Paddington車站會同London多條地鐵線相連，貫穿整個市中心，連希斯路機場亦只需40分鐘就可以由Reading直達，相信Elizabeth Line除咗帶嚟生活便利，亦會帶動商機。Reading有「英國矽谷」嘅稱號，同Manchester一樣，有眾多大企業嘅總部都選擇喺呢個地方設立，例如Microsoft、HP及Oracle等，為科技人材創造大量就業崗位。
五大移民英國城市－交通網絡完善的諾定咸（Nottingham）
Nottingham位於英國中部，係英國最古老嘅城市之一，生活方便之餘亦充滿藝術氣息，到處都保留住歷史建築，隨住政府大力推動創意工業，近年亦有好多從事藝術、創意及科技人才選擇去呢到發展。現時坐火車去倫敦大約需要2小時，但將來高鐵HS2第二期落成後，車程連1小時都唔駛；Nottingham有類似香港嘅輕鐵穿梭市內不同地區，同時巴士網絡都好完善，附近有三個機場，堪稱英國公共交通最完善嘅地方之一。Nottingham嘅另一賣點就係校網，除咗英國公立頂尖研究型大學University of Nottingham，市內有20間獲評級Outstanding嘅公立小學，正因為各方面都有出色嘅表現，樓價升幅穩定，預計未來幾年當地樓價仍然會按年7-8%增長。 循列都講一講，無論您想去以上五個城市，以至其他英國城市都可以搵我哋高永搬屋幫您將家當搬過去英國㗎！如果仲想知道更多關於搬屋／移民搬運嘅資訊，記得Follow我哋嘅Facebook同Instagram啦！
-------⠀
高永搬屋官方網站：http://bit.ly/32HNqeO
高永搬屋Instagram：http://bit.ly/2V0dlwx
線上報價/查詢：http://bit.ly/goingmoving / +852 5595 7455 (Whatsapp)⠀
#高永搬屋#GoingMoving#搬屋公司#搬運公司#搬屋#搬寫字樓#移民#移民搬屋#空運#海運#船運#國際搬運#報關清關#搬運#二手家私#存倉#搬屋報價#免費上門報價#即時報價#線上報價#移民英國