雖然美國冇特別為港人開放移民政策，但作為全球最發達國家，仍然無阻香港人移民美國嘅慾望，希望可以體驗注重開放及平等嘅國度。要移民美國主要分技術移民及投資移民兩大途徑，當中技術移民再細分為三類傑出人才移民、高學位或特殊人才移民及僱主擔保移民，想知更多就一齊睇落去啦！
移民美國方法一：技術移民
EB-1A 傑出人才移民（Alien of Extraordinary Ability）
呢個方法屬於美國移民法規定嘅技術移民「第一優先」嘅類別，亦係配額最多嘅，佔每年全球移民簽證配額中28.6%，即係大約4萬個移民簽證。對象係喺科學、藝術、教育、商業或體育等領域中具有特殊才能、取得成就，並享有國家級或國際性聲譽，而且成果同貢獻都係喺該領域得到廣泛認可嘅傑出專業人才。申請人喺獲得綠卡後需要喺美國繼續從事其領域內嘅工作，並且透過呢份工作對美國社會相關發展提供實質貢獻。為咗吸引全球傑出人才去美國發展，所以不設英語水平、學歷及年齡限制，只要一人申請成功，其餘家人（配偶及21歲以下子女）都可以一同獲得綠卡。
美國EB-1A申請條件：
喺該專業領域內，申請人能夠滿足以下十條申請條件中至少三條： 1. 學士學歷及十年以上相關工作經驗／碩士學歷及五年以上相關工作經驗／博士學歷 2. 執業許可證或專業證書 3. 高薪證明 4. 至少兩個行業協會會員 5. 行業領域獲獎 6. 主流媒體個人專訪 7. 期刊評審、賽事評委、會議發言嘉賓經驗 8. 原創性貢獻（專利、行業標準、科研項目） 9. 國家學術性期刊發表論文至少五篇以上 10. 企業或機構中擔任重要職務
EB-2 "高學位或特殊人才” 國家利益豁免 NIW（National Interest Waiver）
呢個方法屬於美國移民法規定嘅技術移民「第二優先」嘅類別，對象係擁有高學位或者擁有特殊才能，但未能符合申請EB-1A條件嘅人士。國家利益豁免意思係基於國家利益考慮，請求移民局豁免對申請者嘅勞工證要求，亦因為咁佢係屬於EB-2嘅一種，只不過申請人唔需要辦理勞工證，就算冇美國僱主擔保都可以申請。專業領域包括科學、藝術、商業三類，申請人同樣要證明自己喺從事嘅領域係相當出色，亦會對國家產生全國性嘅利益。
美國EB-2 申請條件：
第一類）高學位人士 1. 碩士或博士學位持有者；美國學位或者等同嘅外國學位均可 2. 學士學位及至少五年專業工作經驗
第二類）科學、藝術、商業方面嘅特殊人才須滿足以下六條申請條件中至少三條： 1. 持有專業學位、文憑或培訓證書 2. 擁有至少十年專業工作經驗 3. 持有執業證書（如各類專業工程師證書） 4. 享受高薪或高酬 5. 擁有專業協會會員資格 6. 獲得同行、政府機關、專業組織或商業組織讚許或表彰
EB-3 僱主擔保移民
呢個方法即係通過建立僱傭關係，申請勞工紙到美國工作，並申請美國合法永久居住權，屬於技術移民「第三優先」嘅類別，具體再細分成三類對象： 第一類）專業人士EB-3A（Professional) ） 申請人最少要擁有美國學士學位或外國同等學歷，並且係該專業嘅成員
第二類）技術工人EB-3B（Skilled Workers） 申請人從事嘅工作需要最少兩年嘅相關工作經驗／需要兩年時間培訓
第三類）非技術工人EB-3C／EW3（Unskilled Worker） 申請人從事嘅工作唔需要最少兩年嘅相關工作經驗／唔需要兩年時間培訓 無任何學歷或技能要求，主要係體力勞動嘅工人，例如清潔工、食品加工廠、屠宰工等，唯一限制係唔可以屬於臨時性或季節性嘅工作性質
移民美國方法二：投資移民
EB-5 投資移民（Direct Investment）
呢個方法每年會獲派一萬個名額，要注意嘅係，計劃只接受直接投資，而唔係通過中介進行投資。美國嘅投資移民比其他地方嘅門檻低，無一定嘅英語要求，亦無須投資或經營企業嘅經驗，同時只要每半年入境一次就可以，最重要嘅係，同傑出人材移民一樣，只要一人申請成功，其餘家人（配偶及21歲以下子女）都可以一同獲得綠卡，變相係只要五十萬美元，就可以為全家辦理綠卡。
美國EB-5 申請條件：
1. 申請人需要喺美國進行投資或於高失業率嘅地方中心投入至少五十萬美元 2. 不限於新創企業或購買現有企業嘅股份 3. 可選擇成為一個共享企業嘅合作夥伴（Franchise模式） 4. 申請人必須為直接投資人，同時參與基本管理與監督 5. 該企業必須創造至少十個就業機會