【移民英國】冇BNO點算？一文了解四種熱門移民英國簽證
- Mr Go
- 2022年4月30日
- 讀畢需時 6 分鐘
上兩個星期同大家分享咗用BNO簽證移民英國嘅過程同注意事項，如果您冇持有BNO但又想移民，仲有咩方法呢？嚟緊高生就會講解一吓另外四種英國移民方法：創業移民、升學移民、工作移民，及已經停止申請嘅投資移民；符合特定基本條件嘅港人，可以透過以上途徑，申請獲得臨時居留簽證（Temporary Residence Permit），簽證有效年期不一，如果期滿就要再續簽先可以申請永久居留權，如果續簽唔成功，就可能冇辦法入籍㗎喇。
創業移民英國 - 初創簽證（Tier 1 Start-up Visa）／創新者簽證（Tier 1 Innovator Visa）
顧名思義申請人需要喺英國創立企業，通過移民局的授權機構取得 Endorsement Letter，確認企業創新、可行及可擴展性嘅業務理念。由於「初創簽證」規定嘅投資額低，亦無須專業資格，冇營商經驗嘅申請人亦可以申請。喺英國創立企業並開始營運之後，可以再申請「創新者簽證」／「企業家Tier 1簽證」延長居留期及繼續營運公司，成功獲得以上兩項簽證嘅申請人均可以攜同配偶及子女居留英國。
初創簽證（Start-up Visa）申請條件
- 申請人須年滿18歲以上，來自歐洲經濟區（EEA）和瑞士以外地區
- 英語能力獲 CEFR B2級 或 擁有學士學位／以上學歷
- 證明自己有足夠資金喺英國居留
- 申請簽證90日前，銀行戶口存款須持續為$945英鎊以上（約$9,500港幣）
- 計劃喺英國創業，並有英國高等教育機構／支持英國創業嘅商業機構擔保
- 業務有政府認可機構擔保
申請費用：$363英鎊（約$3,600港幣）
簽證年期：可居留於英國最多2年，其後可申請「創新者簽證」／「企業家Tier 1簽證」，以延長居留期。
*獲取永久居留權所需時間：視乎續簽簽證類別而定
創新者簽證（Innovator Visa）申請條件
- 申請人須年滿18歲以上，來自歐洲經濟區（EEA）和瑞士以外地區
- 英語能力獲 CEFR B2級 或 擁有學士學位／以上學歷
- 證明自己有足夠資金嘅英國居留
- 申請簽證90日前，銀行戶口存款須持續為$945英鎊以上（約$9,500港幣）
- 計劃喺英國創業，業務有政府認可機構擔保
- 投資至少5萬英鎊（約50萬港幣）於業務
（申請人可以單人或二人團隊嘅形式申請，每位申請人投資金額獨立計算，一樣至少5萬英鎊）
申請費用：$1,021英鎊（約$10,000港幣）
簽證年期：可居留於英國最多3年，其後可延長簽證，並申請永久居留權。
*獲取永久居留權所需時間：3年
*首次簽證申請成功後，申請人會獲批為期三年嘅簽證，喺呢三年間援權機構會密切監視申請人嘅生意進度，並會喺第六個月、十二個月同廿四個月進行評估，確認申請人企業喺創新、可行及擴張性方面取得合理發展。如果申請人喺三年內達到以下七項條件嘅其中兩項，就可以申請永居；相反，三年內都未達到相關兩項要求，就要申請續簽，直至滿足條件：
1. 投資至少5萬英鎊於其生意上
2. 客戶數目於近三年內增長達兩倍，並高於英國本土企業平均客戶數目
3. 從事重要研發項目，並已於英國申請知識產權保護
4. 最後一個財政年度全年總收入達100萬英鎊
5. 最後一個財政年度全年總收入達50萬英鎊，其中至少10萬英鎊為出口海外生意
6. 創造至少10個工作職位，需聘請英籍或永居人士
7. 創造至少 5 個工作職位，年薪最少達2.5萬英鎊，需聘請英籍或永居人士
升學移民英國 - 兒童學生簽證（Child Student Visa） ／學生簽證（Student Visa）
申請人可以喺課程開始6個月前（境外）或3個月前（境內）申請，而喺大學畢業後更可以透過畢業生路徑（The Graduate Route），留英兩年（博士生三年）尋找合適工作，以獲得工作簽證或繼續留英發展。
申請條件
- 申請人年齡為4歲至17歲以下（Child Student Visa）／16歲以上（Student Visa）
，來自歐洲經濟區（EEA）和瑞士以外地區
- 18歲以下學生需要父母書面許可海外留學及有委託監護人
- 已獲得學額；不接受初步錄取／有條件錄取（Conditional Offer）（需有CAS，即英國大學嘅電子錄取通知書，有效期為6個月）
- 英語能力證明（學位或以上程度：CEFR B2；學位以下程度：CEFR B1）
- 財務證明有足夠資金喺英國居留及支付學費（以倫敦為例，生活費用門檻為每月$1,265英鎊，即約$13,000港幣）
申請費用：$348-475英鎊（約$3500-$4700港幣；視乎境內／境外申請）
簽證年期：
- 16歲以下：課程年期最多6年，再加4個月
- 16歲至17歲：課程年期最多3年，再加4個月
工作簽證（Skilled Worker；前身為General Work Visa Tier 2）
由2020年12月1日開始，英國正式實施移民政策修正案，Skilled Worker將取代Tier 2 General-Work Visa，實行靈活嘅積分制度，申請人需獲得總分至少70分以獲得簽證。
呢個可能係BNO簽證以外，最容易申請到嘅簽證方法，加上英國脫歐後，僱主毋須再證明未能聘用本地人選就可以請外地人做嘢，變相香港人成功搵工嘅機會更加大。
新積分制下共有九項評分標準：
必須條件（合計50分）：
1）獲得一份有“僱主擔保資質”企業提供嘅工作（20分）
2）符合工作技能要求（20分）
3）英語能力獲 CEFR B1級（10分）
加分條件
1）申請人的薪資等於或超過:
a. 每年$25,600 英鎊；
b. 行業薪資標準嘅崗位工資 （20分）
2）與工作崗位相關嘅博士學位，申請人薪資等於或超過：
a. 每年$23,040英鎊；
b. 崗位工資嘅90%
以上，教育資格將獲得10分，申請人薪資獲得10分
3）與工作崗位相關嘅科學、技術、工程或數學（STEM）學科博士學位，申請人薪資等於或超過： a. 每年$20,480英鎊； b. 崗位工資嘅80% （20分）
4）短缺工種，申請人薪資等於或超過：
a. 每年$20,480英鎊；
b. 崗位工資嘅80% （20分）
5）健康或教育行業工作，申請人薪資等於或超過：
a. 每年$20,480英鎊；
b. 符合崗位工資（20分）
6）申請人為初入職場者（如畢業生），薪資等於或超過：
a. 每年$20,480英鎊；
b. 崗位工資嘅70% （20分）
好似好複雜？簡單嚟講，就係只要您證明您係受聘於內政部批准嘅英國僱主，同時獲得工作類別中嘅最低工資／市場薪金，並符合指定工作技能及英語能力，就可以申請為期五年嘅工作簽證，五年後就可以行申請定居嘅程序。當然，如果期間有轉工或更換僱主嘅情況，一樣需要向有關部門更新資料及滿足簽證要求啦。
有關獲英國移民局許可、持有僱主擔保牌照並可以聘請海外員工嘅公司，可參閱： https://www.gov.uk/government/publications/register-of-licensed-sponsors-workers
英國投資移民計劃（Tier 1 Investor visa）
呢個係開設俾想透過投資英國金融市場嘅投資者，獲得英國居民身分嘅途徑。申請人須投資不少於200萬英鎊喺指定嘅投資產品，持續投資五年後就可以申請永久居留權。「投資者簽證」類似部分歐盟國的「黃金簽證」，最大優勢係審批期短，而且只對投資部分有要求，對申請人本身嘅工作經驗、學歷或英語等係零要求嘅。而申請過程中最常見被拒嘅理由係資金來源不明，申請人需要提供詳細嘅資金來源文件，例如如果資金來源屬第三方轉贈、物業出售、企業利潤或遺產等，都需要提交有關證明文件。如果英國簽證部門對資金來源有顧慮或懷疑，申請就有可能會被拒絕。
不過投資移民計劃已經喺今年2月停止接受申請，所以話您知點申請都冇用，但如果您本身係跟呢個計劃，續簽及申請永久居留權就唔受影響。
如需續簽，條件如下：
- 喺英國持有至少100萬英鎊
- 取得簽證後3個月內，將100萬英鎊全數投資於指定債券、基金、投資產品或英國企業，並於簽證期內持續持有 如果您係新申請，冇BNO又想想移民英國，就要考慮透過頭三種方式申請喇～
想知道更多關於搬屋/移民搬運嘅資訊？記得Follow我哋嘅Facebook同Instagram啦！
-------⠀
高永搬屋官方網站：http://bit.ly/32HNqeO
高永搬屋Instagram：http://bit.ly/2V0dlwx
線上報價/查詢：http://bit.ly/goingmoving / +852 5595 7455 (Whatsapp)⠀
#高永搬屋#GoingMoving#搬屋公司#搬運公司#搬屋#搬寫字樓#移民#移民搬屋#空運#海運#船運#國際搬運#報關清關#搬運#二手家私#存倉#搬屋報價#免費上門報價#即時報價#線上報價#移民英國#申請BNO#太空人計劃 #移民簽證
Comments