【樓市點睇】查凶宅


查凶宅

之前喺擇吉日嘅限時動態入面同大家做過不正式統計,發現「寧可信其有」同「隨緣」嘅日各佔一半一半,咁唔知道同樣係搬屋界熱門話題嘅「住凶宅」,大家又覺得需唔需要避忌呢?


由於香港堪稱係全球樓價最貴嘅城市,大家諗住辦法就係想可以快啲上樓,其中有唔少人會心口掛個勇字、專揀凶宅住,因為就算係鬧市盤,售價或租金都平一大截。但相反,如果您嘅底線係點都要住得安心,唔想揀到凶宅嘅話,可以點做呢?首先要明白,我哋係冇辦法百分百查到凶宅嘅,因為無論係法律上定本義上,凶宅都冇統一嘅定義,最顯淺嘅可以係單位內發生非自然死亡事件,但如果係極度忌諱嘅,可能係笑喪單位都會被視為凶宅,所以唯有盡自己嘅能力翻查資料,再按自己嘅接受程度去選擇入住與否。


第一個方法,就係查兇宅網,網上面有好多非官方嘅兇宅資訊網站,收集咗唔同命案嘅資料,例如肇事單位座數、高中低層及意外類型,不過呢啲資料比較攏統,亦未必全部都經過精密嘅核對,準買家可以自行參閱及判斷可信性,建議配合其他方法再作進一步查證。 地產資訊網: https://www.property.hk/unlucky.php 香港地產網: http://www.hkea.com.hk/UHousesServ


第二個方法係去土地註冊處查冊,查冊可以睇到前業主嘅資料以及該物業嘅背景,如果業主過咗身,單位屬於遺產物業,查冊上面就會有死亡證嘅登記,準買家可以藉此得知其死因及死亡地點,不過顯示嘅只會係業主本人,租客嘅資料係唔會知道嘅。

第三個方法係向銀行查詢估價,有傳香港嘅銀行有一份非公開嘅黑名單,上面列有所有凶宅嘅,作估價或批按揭之用,而華資銀行就會對凶宅定義比較保守,有可能連凶宅單位嘅同一層或上下層都唔會進行估價,喺網上系統會見到物業價值顯示為「0」、「N/A」或「需致電職員聯絡」。所以三個方法入面,向銀行查詢物業價值係最能夠反映該物業「乾唔乾淨」嘅。 匯豐銀行: https://www.hsbc.com.hk/....../tools/property-valuation/ 恒生銀行: https://www.hangseng.com/zh-hk/e-valuation/keyword-search/ 中銀銀行: https://www.bochk.com/tc/mortgage/expert/expert2.html 渣打銀行: https://www.sc.com/....../mortgage....../property-valuation/


當然,您都可以試吓直接問返經紀,不過由於人人對凶宅嘅定義都唔同,加上根據《地產代理條例》,佢哋其實冇責任向您和盤托出,所以如果您有懷疑,最好都係做多幾步,完成放心先好落實交易,始終凶宅並唔屬於業權瑕疵,唔可以成為「踢契」、即係取消交易嘅理由,要好好諗清楚呀!

- 想知道更多關於搬屋/搬Office嘅資訊?記得留意我哋嘅Facebook同Instagram啦! ------- 高永搬屋官方網站:http://bit.ly/32HNqeO 高永搬屋instagram:http://bit.ly/2V0dlwx 線上報價/查詢:http://bit.ly/goingmoving / +852 5595 7455 (Whatsapp)

#高永搬屋 #GoingMoving #搬屋公司 #搬屋 #搬屋報價 #搬屋吉日