2020年10月17日

【新居入伙】入伙前清潔3大重點

好多人都知道裝完修後，新居入伙前要清一清潔先得，但係搵清潔公司就搞太貴，決定自己做清潔時又有咩要注意呢？

注意通風 裝修完最擔心嘅都係有機會殘留咗甲醛喺屋企，坊間有好多除甲醛嘅方法，但係最低成本同最有效嘅，始終都係開窗通風。建議您喺裝修完工後就可以即刻開窗等空氣流通，最好就維持一兩個月，因為開窗可以除潮氣、驅散異味、去甲醛等，亦可借陽光嚟殺菌。

注意清潔順序 要達到有效率地清潔新居，清潔嘅順序都一定要注意！而清潔次序基本上就係「由上至下，由內至外」。先由房間開始，然後到廚房同客廳，記得最後先清潔浴室，因為清潔時會經常換水，所以留返最後清潔係最好。清潔浴室同廚房時記得留意返磁磚同玻璃膠有冇留低膠漬，有嘅話要及早清潔。

正確使用漂白水 幾乎每個家庭屋企都會有漂白水，但好多人都唔知其實漂白水有一定嘅腐蝕性，所以使用時要戴手套同埋用清水稀釋，大家可以參考衛生署嘅指引：

1:4用於消毒被血液污染嘅表面 1:49 用於消毒被嘔吐物、排泄物、分泌物污染嘅表面 1:99 用於一般家居消毒

要留意漂白水唔可以用熱水稀釋，稀釋亦都唔可以擺太耐。要達到最佳消毒效果，最好就係用稀釋完漂白水直接抹落物件表面，然後自然風乾。

無論係咪新居入伙都好，家居消潔一定要做足，尤其係宜家疫症仲未穩定，做好消毒先住得安心放心！

最新文章