雖然話搬屋同搬寫字樓一樣，只要俾齊資料搬屋公司報價，保持良好溝通，萬大事都有搬屋公司同您搞掂佢。但始終搬Office牽涉嘅人數比較多、租約彈性較低，仲要通知客人及其他政府部門轉新地址，所以都係越快Settle好就越理想啦。今次高生就會將搬公司嘅準備事項濃縮成四個步驟，對住個Check List做就實冇問題啦！
第一步：擇吉日
萬事起頭難，但定好邊日搬就至少有動力喺Deadline之前完成任務！而大多數公司企業都會寧可信其有，始終都想盤生意風山水起、客似雲來嘛，所以建議大家揀好咗搬辦公室吉日先，一嚟容易安排簽約後至到搬運前嘅準備工作，二嚟確保到搬屋公司可以預留心水嘅日子同時間俾您。喺擬定咗搬遷日期之後，記得記得諮詢埋新舊址嘅大廈管理處，避免因為撞正電梯維修又或者係其他唔可以搬運嘅理由而影響搬運計劃。
第二步：整理搬運及棄置物品
基本上大部分業主都會要求舊租客搬走前清場及還原單位，所以同事們都要知道有邊啲物品要搬、邊啲要扔、邊啲上牆物品要拆返落嚟，甚至填返個鑽孔，如果係能力範圍以外嘅工作，就要及早搵相關嘅服務供應商報價同幫忙喇。另外，搬屋公司最常見嘅報價方式，係會因應搬運物品數量多㝰及種類複雜程度而定價，所以預先淘汰無用嘅物品，例如唔會再翻閱嘅文件、已經壞咗嘅家私及電器等，一嚟慳返不必要嘅搬運費用，二嚟去到新地方又唔駛苦惱要將佢哋收埋去邊到。如果要棄置嘅物品太多，又或者係包括大型家私，就可以喺搵搬屋公司嘅時候提出棄置需要，有部分公司甚至可以提供清拆還原服務，雖然會有額外嘅費用，但就可以確保到有專業人士幫您輕鬆解決問題。
第三步：分工收拾個人或辦公室物品
好多時搬Office都係會由Admin負責搵搬屋公司報價，但如果公司有一定規模，佢哋未必完全了解各個部門有咩需要搬及處理，作為搬屋公司嘅我哋會建議可以由各部門統計好需要搬運／棄置嘅物品之後，再交俾Admin統一資料，然後向搬屋公司索取報價，咁就可以確保到報價已包括貴公司所需要嘅服務內容，唔駛驚臨場超支嘅問題喇。順帶一提，雖然大部分搬屋公司都會免費派送包裝物料到您公司，但由於人手、車油都係成本，一般情況下都只係會免費派送一次，如果係因為空間存放問題要分開幾次拎物資，又或者係用用吓先發現唔夠紙箱，就有可能要額外俾物料運送費。所以最好就係喺報價時準備到比較有參考價值嘅資料，亦可以同搬屋公司商量一吓，睇吓可唔可以預先拎定多少少物資以備不時之需。
第四步：搬運前最後整理
相信經過一輪衝鋒陷陣，搬前一兩日嘅大家都一定係身心俱疲㗎喇，呢個時候，可以簡單將同類型嘅搬運物品放埋一齊，例如按物品種類（紙箱類、電器類）、按部門、按人頭、按新址區域等，一方面方便搬運前嘅點算（另可製作清單以便搬到新址後檢查物品有無遺漏或受損），另一方面亦可以等師傅清晰咁了解搬運流程。電器方面，可以事先拔走電源，電線、火牛、數據線、搖控等呢啲瑣碎嘢就集中放入一袋/一箱，方便大家去到新址唔駛花時間搵邊條線打邊條線，可以好快就重新接駁電源及投入工作，亦方便師傅嚟到就可以直接幫電器做保護，加快搬運進度。
除咗以上四步關於搬Office嘅準備事項，為咗公司服務唔會受阻，記得事先聯絡電話公司同互聯網公司處理轉駁電話及搬遷寬頻嘅服務啊，另外亦可以到政府一站通，入面嘅網上更改地址服務可以一次過同23個政府部門同7個非政府機構更改地址紀錄（包括水務署、香港郵政、房屋署、稅務局等等），咁就唔怕錯過重要嘅信件啦。希望未來有需要搬辦公室嘅各位，都可以搬完之後風生水起，大展鴻圖，開工大吉！
想知道更多關於搬屋/搬office嘅資訊？記得留意我哋嘅Facebook同Instagram啦！ ------- 高永搬屋官方網站：http://bit.ly/32HNqeO 高永搬屋instagram：http://bit.ly/2V0dlwx 線上報價/查詢：http://bit.ly/goingmoving / +852 5595 7455 (Whatsapp)
Comments