【搬屋攻略】新居入伙清潔貼士


家居清潔

經過呢兩年疫情嘅衝擊,全民衛生意識大大提高,相信亦都有唔少清潔心得,特別係搬完屋新居入伙之前,緊係想徹底幫新環境做好清潔消毒,迎接新生活啦,近年坊間都有唔少清楚公司主打消毒除甲醛一條龍服務,但閑閑哋都可能要額外俾多幾千蚊,如果您預算有限又寧願信自己,一齊嚟睇吓高生有咩入伙清潔貼士啦!


1. 工欲善其事,必先準備好:

個人:首先,緊係要保護好自己,講緊嘅就係一套可以遮蓋全身皮膚,並且方便用完即棄嘅工作服喇,最好有齊鞋套、手套、口罩、帽,以免外露嘅地方接觸到灰塵同油漆。


地板清潔工具:最基本就係要有吸塵機、掃把、拖把、抹布(建議用準備扔走嘅棉質衣服,吸水又環保)、漂白水、地板清潔劑及保養劑等。


牆身清潔工具:預備好短毛刷、砂紙、鏟同埋木梯,如果有心清潔較高嘅牆面,記得做好安全措施同有人陪同在場先好開始!


2. 確保空氣流通

清潔過程一定會用到大量清潔劑、漂白水等,如果喺空氣唔流通,隨時會因為持續吸入化學氣體而身體不適。如果您係啱啱裝修完,應該都會擔心吸入甲醛嘅問題,坊間有好多除甲醛嘅方法,例如用活性炭、白醋、紅茶,甚至係甲醛淨化劑,但其實最有效又低成本嘅,始終都係開窗通風,可以嘅話最好就維持一兩個月,除咗可以散味去甲醛,更加可以借陽光嚟殺菌。


3. 注意清潔順序

唔想搞嚟搞去得個吉,個地拖極都有黑鞋印,就要注意清潔嘅順序喇,簡單嚟講就係八個字:由上至下,由內至外。先由房間開始,然後到廚房、客廳,記得最後先清潔浴室啊,因為打掃過程中經常會去廁所更換清潔用嘅水同洗手,所以留返最後先處理就最好。將大型垃圾掃走之後,可以用吸塵機吸走啲塵同垃圾碎屑。高生唔太建議用掃把,因為一掃可能會令微細嘅粉塵飛到走圍都係,增加身體過敏/鼻敏感嘅機會;而吸塵機方面,最好就揀濾網有 HEPA規格嘅(美國標準分級 High-Efficiency Particulate Air filter,高效空氣過濾濾網),可以將超過99.7%、0.3微米(μm)以上嘅懸浮微粒及細菌過濾。然後用地板清潔劑/稀釋漂白水消潔一次,最後再過清水就乾淨晒。如果有新舖磁磚,最好就盡快抹走磁磚上嘅水泥污漬,唔係嘅話留得越耐就越難清走㗎喇。


4. 正確使用漂白水

漂白水除咗係清潔污漬嘅好幫手,仲可以消滅頑固惡菌同病毒,而漂白水有一定嘅腐蝕性,所以使用時記得戴好手套保護自己,而要用幾多清水去稀釋就視乎您嘅用途,可以參考返衛生署嘅指引:


1:4 消毒被血液污染嘅表面

1:49 消毒被嘔吐物、排泄物、分泌物污染嘅表面

1:99 一般家居消毒


記住記住漂白水係唔可以用熱水稀釋㗎!亦都唔好同其他清潔劑混合使用,避免產生有毒物質,稀釋之後亦都唔可以擺太耐,如果唔係,漂白水入面含有嘅次氯酸鈉完成分解(一般家用漂白水含有濃度大約係5.25%),就會失去消毒功效。要達到最佳消毒效果,最好就係用稀釋完嘅漂白水直接噴喺物件表面,然後等佢自然風乾。


做足上面嘅清潔,就可以搵我哋幫您搬運家私同個人用品入屋,不過搬完都要再清潔一次地板同啱啱搬入屋嘅家私,咁就可以安心搬入新屋喇!其實就算唔係新居入伙,間唔中執吓屋、深層清潔吓居住環境都係一個唔錯嘅放空活動,特別係疫情期間留喺屋企嘅時間多咗,搵方法令自己住得舒服、自在,自然百毒不侵。


想知道更多關於搬屋/搬office嘅資訊?記得留意我哋嘅Facebook同Instagram啦!

-------

高永搬屋官方網站:http://bit.ly/32HNqeO

高永搬屋Instagram:http://bit.ly/2V0dlwx

線上報價/查詢:http://bit.ly/goingmoving / +852 5595 7455 (Whatsapp)


#高永搬屋 #GoingMoving #搬屋公司 #搬運公司 #搬屋 #搬寫字樓 #移民 #海外搬遷 #存倉 #搬屋吉日 #二手家私 #紙箱 #包裝物料 #執屋 #搬運 #搬屋報價 #立即報價 #搬屋收費 #家居清潔