【搬屋攻略】做個好鄰居,噪音處理您要知


噪音投訴


早排WFH已經要被逼忍受樓上裝修嘅噪音攻擊,但係平日辦公時間,唯有互相忍讓,但連星期日諗住可以瞓晏啲,都要繼續鑽鑽鑽揼揼揼剁剁剁…唔想再忍可以點做?高生今日就同大家分享吓點樣處理噪音滋擾,同埋一齊探討吓點樣投訴先有用啦! 正所謂對症下藥,要針對性及有效地處理噪音問題,首先當然要了解咗噪音嘅來源先啦,一般民居最常見嘅噪音滋擾,大致上可以分為四大類:


1. 鄰居/家居噪音

指所有由住所內發出嘅噪音,例如裝修、寵物叫聲、朋友聚會嘅喧嘩聲、音響開得太大聲、打麻雀聲,或者係家電運作時嘅機械聲(例如冷氣機、吸塵機等等)。根據噪音管制條例第4條,一般情況下,唔可以發出噪音嘅時間為23:00至翌日07:00;而公眾假期就係全日禁止發出噪音,不過由於冇明確嘅分貝指引,即係話就算您決定報警處理,都要靠警方判斷該音量有冇對其他人造成滋擾。如果鄰居違反時間限制,而警方亦認同係屬於噪音並造成滋擾,決定落簿檢控,一經定罪,違例者最高可被判罰款港幣一萬元。


時間管制會因應噪音類型而有少少分別,例如

A. 裝修噪音

如果係使用機動設備進行大型裝修嘅話,19:00就需要停止工作;使用手提機械用具進行小型裝修嘅就可以做到23:00 B. 寵物叫聲

只要住所內嘅動物發出擾人噪音,不論朝早定夜晚都屬於違法。如果您係住私人樓宇,按照大廈公契,業主立案法團及物管公司有權向法庭申請禁制令,要求住戶將相關動物遷出住所,就算租約上面冇寫明唔可以養寵物都好,最後業主會點樣處理,都要視乎實際情況,所以都係盡量避免發生以上情況較好


C. 鄰居開Party、打麻雀、電視、音響等噪音

任何時間,只要因進行任何娛樂活動而發出擾人噪音,均有機會遭受檢控


家居噪音主要由物業管理公司及警方負責跟進,如果您受到呢方面嘅困擾,首先要記錄低證據,例如錄音、錄影,並抄低發生時間、懷疑噪音來源等資料,等之後負責人員參考。之後就可以聯絡房屋署或管理處;公屋住戶通知房屋署之後,當局會派屋邨職員到場調查,了解情況後,一旦投訴成立,屋邨職員會向造成滋擾嘅住戶作出口頭勸諭或發信警告,如果情況未有改善,住戶就會被扣5分,不過如果係因為違反《噪音管制條例》而被起訴,房署就唔會俾警告,而係直接扣分;私樓住戶向管理處作出投訴之後,管理處會按大廈公契採取行動,如果評估之後證實係違反公契,管理公司就有權向有關住戶客採取法律行動,甚至追討賠償,就算公契默許飼養寵物,但如果寵物對鄰居構成嚴重滋擾,並且有住客就寵物噪音作出投訴,管理公司亦可以向法庭申請禁制令。如果不幸地投訴都解決唔到問題,就唯有報警求助,市民可以直接致電各區警署,或者透過警方嘅電子報案室進行投訴,警方接獲投訴之後,會派人前往相關地點視察,證據充分的話就會作出檢控。不過,由於搜證需時,加上要有確實證據證明噪音係由該戶發出,因此要有心理準備正式落案檢控需時較長。


2. 地盤噪音

指道路工程、打樁等活動產生嘅噪音,根據法例規定,呢類工程只可以喺07:00至19:00期間進行。但如果事出突然需要緊急處理,例如爆水渠等等,只要工程獲得環保署簽發嘅「建築噪音許可證」,就有機會可以不受時間限制。至於分貝指引方面,以一般住宅起樓、拆樓工程為例,平日須限於75分貝內,視乎事發地點本身環境噪音多㝰,市中心嘅話,由於鬧市本身就比較嘈,分貝限制會較為寬鬆,一般上限為45-70分貝;打樁工程分貝上限會調高,視乎地區,一般會限制於85-100分貝,接近院、診所、教育院校的話,需要降低噪音,分貝上限再下調。法例對地盤噪音設有明確嘅時限同分貝管制,環保署會採取防範行動,預測地盤噪音係唔係標準之內,因而決定會唔會簽發「建築噪音許可證」,亦即係話,一般街頭見到嘅合法地盤,絕大部分嘅噪音程度已經獲得環保署許可。 如果市民受到地盤噪音滋擾,可以致電環保署顧客服務中心(2838 3111),或到轄下4個辦事處進行噪音投訴。 如果地盤冇「建築噪音許可證」或者冇按許可證規定嘅方式及時限進行工程,就會按規定作出檢控,首次定罪最高罰款為港幣十萬。


3. 其他公眾地方噪音

指叫賣、集會、警報系統等噪音,市民可以於任何時間作出噪音投訴,但由於法例冇明確分貝限制,一切由警方判斷有冇對他人造成滋擾。

A. 處所內(如家居、商舖防盜系統)唔可以鳴響超過15分鐘,違者罰款港幣一萬及監禁三個月 B. 車輛防盜系統唔可以鳴響超過五分鐘,違者罰款港幣一萬


4. 工商業噪音

指工業、商用處所等地方,喺日常營運中發出嘅噪音,例如食肆通風系統、水泵系統、車房維修汽車工作、酒吧音樂聲、演唱會音響等。呢類噪音係由「環境保護署」管制,當局會量度受調查嘅噪音,如果發出嘅音浪超出法定標準,當局會向有關人士或機構發出一份「消減噪音通知書」,要求佢哋喺指定限期內,將噪音減至法定標準之內。如果違反通知書嘅規定就會作出檢控,一經定罪,最高可罰款港幣一萬。


噪音滋擾屬刑事罪行,除非事發嚴重,一般嚟講,警方及環保署多數都係用協調、勸喻等方式達致減噪目的,但比起自己又或者係大廈保安,有權威性嘅組織介入,一定係比較有阻嚇性。其實冇人會希望搞大件事,只要大家可以設身處地、換位思考,切忌抱住一個「側側膊唔多覺」嘅心態去以身試法,咁就大家都可以有一個安樂窩啦!提提大家,高永團隊係可以為大家提供家私上牆服務嘅,不過如果您有呢項需要就要避開揀公眾假期作為您嘅搬運日,,始終紅日係全日都唔可以鑽嘢㗎。


想知道更多關於搬屋/搬office嘅資訊?記得留意我哋嘅Facebook同Instagram啦!

-------

高永搬屋官方網站:http://bit.ly/32HNqeO

高永搬屋Instagram:http://bit.ly/2V0dlwx

線上報價/查詢:http://bit.ly/goingmoving / +852 5595 7455 (Whatsapp)


#高永搬屋 #GoingMoving #搬屋公司 #搬運公司 #搬屋 #搬寫字樓 #移民 #移民搬屋 #空運 #海運 #船運 #國際搬運 #搬運 #二手家私 #存倉 #搬屋報價 #免費上門報價 #即時報價 #線上報價