【搬屋收費】點解間間搬屋公司收費咁唔同?一文全面拆解搬屋公司嘅計價方式


搬屋收費

如果您有搵過搬屋公司,同時又有認真去格價嘅話,應該都會覺得搬屋收費好似有啲「海鮮價」咁。到底點解明明同一個單位,俾一樣嘅資料,唔同公司嘅報價可以差咁遠?好多人都搞唔清到底搬屋公司係用咩準則定價,如果您覺得自己根本唔需要知,咁就隨時會跌入加價陷阱,今日我哋就嘗試幫大家拆解搬屋收費嘅秘密。首先,我哋要了解一下搬屋公司有邊幾種收費模式,而現時香港市場上嘅搬屋公司收費模式主要有以下四種:


搬屋收費方式一:逐件收費

第一種係近年興起嘅逐件計收費模式。呢類公司會將要搬嘅家私、電器細分幾十個類型去定價,然後加上家私裝拆費、出車費、佔車嘅空間費用等等雜費。咁樣好處係報價可以好似去酒樓食嘢,俾客人剔點心紙咁剔出要搬嘅物品,作為客人嘅您一定會覺得咁樣夠清晰、簡單又方便。通常呢種收費模式係會有最低收費,大概$500-$700不等。參考某啲逐件計公司嘅網站,如果您要搬一張標準單人床(要裝拆)、一張三座位梳化(毋須裝拆)同埋一部鋼琴(毋須裝拆),唔計包裝物料及車費等其他雜費,大概要$1100左右。呢種收費睇落會較清楚明確,但無論紙箱數量同包裝物料等就要另外收費,所有嘢拆散嚟計好似平啲,但最後加埋加埋其實都未必係抵啲。用呢種方法,要您係一個時刻清晰知道自己有幾多嘢要搬,先會做到一個好嘅預算,如果唔係到時發現漏咗一個茶几、一個掃把,對方都有權向您收取額外費用,搬屋混亂起嚟,最後嘅費用隨時會超出您預算好多㗎!


搬屋收費方式二:按呎價收費

第二種係以前比較多公司用嘅,就係根據屋企呎數去定價,500呎一個大概嘅價錢,1000呎一個大概嘅價錢,就係咁簡單。您可能會覺得好奇怪,有啲人住劏房都可以有幾十箱嘢,有啲人住成千呎都可以得好少嘢,咁點樣可以定到價呢?因為呢個計法嘅公司一般只會接受做所謂「全Packing」嘅服務,即係搬屋公司幫您執好晒啲雜物入箱,搬好晒嘢之後去到新屋又幫您拆埋箱,價錢一般會較貴,所以可以有較大Buffer,唔駛要知道晒有啲乜嚟報價。不過因為香港小型家庭越嚟越多,大部分人可以自己收拾好自己嘅物品,加上香港物價指數高,唔少人都會有慳得就慳嘅心態,所以大家寧願自己忙啲都想慳多啲錢(疫情之下就更加想節省開支),呢一種收費模式亦都越嚟越少見。


搬屋收費方式三:按物件佔用車嘅空間收費

第三種係計車數,即係按您要搬嘅家私雜物佔貨車嘅空間大小嚟收費,例如1/4車一個價,3/4車一個價咁,當然一日未放上車,您又點知會放幾多位呢?所以報價參考性並唔高,風險都相對較大,更加要注意嘅係,要搬嘅嘢全部都係由搬屋公司搬上車,所以佔嘅空間有幾多、擺放嘅位置、係唔係善用好每一個位,可以話係由佢哋全權決定。一般搬屋公司會根據經驗同以安全性為考量,去幫您諗車上嘅物品點擺放先最安全,但按車數收費嘅公司有機會將搬運物品放得比較鬆散,真係講個信字,如果您想選擇呢種收費模式,一定要揀間有聲譽、可靠嘅搬屋公司。


搬屋收費方式四:綜合報價

第四種係根據綜合考慮再作出報價嘅公司,影響價錢嘅因素包括家私種類、拆裝時間及技術、雜物數量、搬運環境等。雖然呢種收費模式嘅透明度好似唔太高,但相對上係最彈性同最人性化嘅,因為現實中每個家庭嘅搬運情況都唔同,從大廈搬運環境、家私類型、雜物數量都唔能夠一概而論,如果只係用單一側重點嚟收費(例如以上提到嘅單位呎吋、貨車車數),未必全面顧及到搬屋公司及客人嘅需要。當搬屋公司喺報價階段已經對整個搬運流程有清晰嘅畫面,報價一定會比較有參考價值。


唔少人都覺得搬屋公司就係會坐地起價嘅慣犯,因為往往最容易起爭拗嘅位,就係去到搬屋當日,師傅以各種理由臨場加價,撇除部分黑心公司唔講,其實好多時都係因為喺報價階段,搬屋公司有盲點、未能清楚掌握客人嘅搬運情況。所以我哋建議您可以搵多幾間搬屋公司報價,準備好所需嘅報價資料,加上其他會影響收費嘅因素,等搬屋公司報一個完整價錢俾您,如果發現報價比較參差,可以試吓問最貴嗰間公司嘅原因,睇吓其他公司有冇將呢啲原因納入報價。相信喺親身接觸過唔同公司之後,您都會搵到一間無論價錢定服務質素,都係最適合您嘅公司。


想知道更多關於搬屋/搬office嘅資訊?記得留意我哋嘅Facebook同Instagram啦!

-------

高永搬屋官方網站:http://bit.ly/32HNqeO

高永搬屋Instagram:http://bit.ly/2V0dlwx

線上報價/查詢:http://bit.ly/goingmoving / +852 5595 7455 (Whatsapp)

#GoingMoving #搬屋公司 #搬運公司 #搬屋 #搬寫字樓 #移民 #海外搬遷 #存倉 #搬屋吉日 #二手家私 #紙箱 #包裝物料 #執屋 #搬運 #搬屋報價 #立即報價 #搬屋收費