好多人會覺得，搬屋嚟講最麻煩可能係大件或者要拆裝嘅家私，但係以我哋嘅經驗，一般最煩最難到客人或者搬運師傅嘅，就係處理各式各樣嘅瑣碎嘢，除咗之前提過點樣包裝易碎物品，今次高生嚴選咗其中三種「搬屋界麻煩嘢」，即刻睇吓幫唔幫到您啦！
幾百對冇鞋盒嘅鞋
好多人搬屋嗰陣先發現原來屋企有咁多鞋，仲要唔係個個都有Keep鞋盒，咁點先唔會搬到搵極都搵唔到右腳，又唔怕塞到佢哋變形？（您知好多鞋都係珍藏嚟，有啲連個鞋盒都好重要！）首先可以將啲鞋分類成常用同唔常用嘅，又或者係男裝女裝等，然後分開放入袋，盡量一個袋唔好多過兩對鞋，唔夠袋／背囊用嘅話，膠袋都用得㗎，罕有嘅鞋盒就留返俾會較易篤穿袋嘅高踭鞋，如果您怕啲鞋會變形嘅話，可以將啲襪或者報紙塞入去，鞏固返個鞋形。
價值連城嘅古董／收藏品
最理想當然係有原裝嘅錦盒或者紙盒啦，冇都唔緊要，只要包裝盒內有適當嘅緩衝物，例如氣泡塑布（即Bubble紙）、珍珠棉，甚至報紙，等佢哋唔會輕易因外來撞擊或互相碰撞而整爛整花。其實如果唔係大型嘅物品，我哋都建議客人考慮Hand Carry自攜到新屋，始終獨立處理先會俾到最悉心嘅保護。高永亦有提供訂製木箱服務，等您嘅珍品可以有多一個穩固嘅外殼保護。如果有特別考量，可以預先自行購買保險，有需要嘅話，我哋都有提供購買保險嘅服務㗎。
雪櫃入面嘅食物
好多客人都以為搬雪櫃一定要提早拔電線，仲要拎晒入面嘅嘢出嚟，但其實係搬屋當日先需要斷電，所以除咗要清走易碎同會融水嘅物件，例如雞蛋、玻璃、杯碟、冰塊等，其他食物同紙包飲品都可以留喺雪櫃一次過搬走，最好就係盡量將雪櫃每一格都塞滿，等搬運時入面嘅嘢唔會郁嚟郁去，減少碰撞嘅機會，如果唔係入面有好多空位嘅話，即使唔係易碎嘅物品，都會有機會喺搬運途中受損。如果您個雪櫃唔駛搬，就應該事先準備好保溫袋，臨搬前先拎出嚟入袋再入箱，正常入面啲嘢都唔會話變壞嘅，時間同您平時去超市買凍肉一樣，買完返到屋企都要成個零兩個鐘都冇壞。當然記得要mark低邊個箱，去到新屋就要拆箱放返入雪櫃喇！
全部都好難呀
唔難唔難！其實最重要嘅都係好好分類，例如將要入箱嘅雜物分成： - 必需品（牙刷、碗筷等日常用品） - 非必需品（書本、公仔等裝飾品） - 直接封存嘅物品（換咗季嘅衣物、本身就比較少拎出嚟嘅物品） 等您搬到新屋後可以按照需要嘅程度嚟開箱，冇咁重要嘅雜物可以之後再慢慢拆開還原，咁就冇咁崩潰啦！ 亦可以按照區域嚟執嘢，例如廚房、浴室同卧室等，再細分易碎、必需、裝飾等等，到時搬到去新屋就可以逐間房執，亦都唔會搞亂啲嘢。不過無論點分類都好，執完記得要喺紙箱上寫返記號，特別係易碎物品，等自己同搬屋師傅都可以特別留意嘛。
想知道更多關於搬屋/搬office嘅資訊？記得留意我哋嘅Facebook同Instagram啦！ -------⠀ 高永搬屋官方網站：http://bit.ly/32HNqeO 高永搬屋Instagram：http://bit.ly/2V0dlwx 線上報價/查詢：http://bit.ly/goingmoving / +852 5595 7455 (Whatsapp)⠀
Comments