【居屋2022】一文比較七大屋苑


抽居屋

今期居者有其屋七個屋苑合共提有8926個單位可供選購,係自2014年復售居屋以嚟數量最多嘅一次,港島、九龍、新界甚至離島都有,緊有一個屋苑合您心意!喺仲開心緊中咗籤嘅同時,一齊了解吓各個候選屋苑嘅優缺點啦!


最快落成、呎價最低:東涌裕雅苑

東涌裕雅苑預計今年九月完工,甚至係唯一一個屋苑有機會現樓發售嘅。六座住宅大廈,總共提供3300個單位,實用面積介乎272至555呎,售價約130萬至355萬,平均呎價HK$5,730,係七個屋苑入面單位數量最多、擁有最大面積單位及呎價最低之選。地理位置方面,屋苑鄰近東環、映灣園,部分單位望到海及機場。不過交通配套較輸蝕,距離港鐵東涌站需步行至少15分鐘。雖然裕雅苑計劃設有9,365呎零售樓面,但最主要嘅生活配套應該都係要靠公屋迎東邨嘅迎東商場,設有18間商舖包括零售、超市、快餐店及便利店等,可以簡單處理日常生活用品,但如果要行街購物,都係要行返去東薈城喇。


寧靜社區之選:沙田愉德苑

沙田愉德苑預計2023年年中落成,屋苑屬單幢項目,總共提供543個單位,實用面積由281至463呎不等,售價約174萬至337萬,平均呎價HK$6,780。地理位置方面由於係喺熱門私樓沙田第一城對面,所以各方面配套都一定比較有信心保證,例如交通方面,由愉德苑步行大約四分鐘就已經可以去到屯馬線石門站;生活方面,可以選擇鄰近嘅京瑞廣場、碩門街市,行出少少,亦有置富第一城、置富第一城‧樂薈兩個商場。不過景觀方面,部分單位望到城門河景色嘅同時,部分單位亦都可能會受旁邊永得利工業大廈嘅噪音及賽馬會傑志中心嘅燈光影響,特別介意呢兩方面嘅買家就要留意喇。


最多商場嘅舒適社區:將軍澳昭明苑

將軍澳昭明苑預計2024年下半年落成,同樣屬單幢項目,共提供594個單位,實用面積由283至461呎,售價約169萬至335萬,平均呎價HK$6,920。周邊不乏出名嘅屋苑項目,例如新寶城、煜明苑等,所以算係發展成熟嘅地區。特別係休閒配套方面,喺昭信路附近擁有大型嘅坑口文曲里公園,行遠少少又有常寧遊樂場,區內亦設有將軍澳運動場、香港單車館、將軍澳運動場、七人草地足球場等等,康樂設備十分齊全。生活配套方面,鄰近有不同大型購物商場,例如東海城、TKO Gateway。交通亦算係便利,由昭明苑步行去坑口港鐵站大概只需時六分鐘。不過同沙田愉德苑一樣,注意景觀嘅買家要留意嘅係,屋苑正因為鄰近多個大型樓盤,周圍都係以較密麻麻嘅樓景為主,加上西南面係港鐵持有嘅「百勝角通風大樓」,預計即將興建嘅兩座物業高度達130米,同昭明苑本身高度相若,所以要有心理準備入住後眼前都會係「樓景」。


最強校網、家長首選:土瓜灣冠山苑

土瓜灣冠山苑預計2024年年尾落成,屬於單幢項目,採取一字型排開設計,共有495個單位,單位面積介乎281至447呎,售價約188萬至364萬,平均呎價HK$7,680。樓盤位於紅磡高山道及山西街交界,步行去港鐵土瓜灣站只需要向北行一條直路,大約三分鐘就可以到達。不過最強優勢唔係交通,而係冠山苑啱啱好跌入名校區34校網之內,相信對於追求名校網絡嘅買家嚟講會係一大亮點。至於生活配套方面,可以行十分鐘到土瓜灣市政大樓又或者係黃埔站附近嘅商場,可算係中規中舉。不過呢個屋苑存在住兩個大問題,一係屋苑以東南就係車來車往嘅漆咸道北,而上方就係東九龍走廊,汽車噪音一定會對住戶造成困擾;二係屋苑向東南嘅單位,除咗客飯廳主要嘅窗需要採用用六角匙先開到嘅減音窗,外面更要連接一個減音露台,設計同東涌裕泰苑一樣,減音露台底部係密封嘅石屎牆,頂部係減音窗,露台兩邊有隔音鰭,就好似凸出嚟嘅石屎外牆,意味住陽光會較難入到屋,而呢個減音露台足足佔咗實用面積嘅33至41呎,變相被逼要俾25至31萬嚟買呢個實用性成疑嘅露台。


最少競爭之選:觀塘安秀苑

觀塘安秀苑預計2024年年尾可以入伙,將提供1906個單位,實用面積為279至479呎,售價約153萬至325萬,平均呎價HK$6,590。居屋位於九龍東北區安達臣道石礦場用地,屬市區較偏遠地段,與港鐵站及區內主要商場有一定距離,日常購物僅可以去秀茂坪嘅屋邨商場。公屋聯會總幹事招國偉早前就預計,安秀苑會係七個屋苑中受歡迎程度最低嘅一個。雖然喺唔少計劃書都見到安達臣道石礦場嘅發展方向,例如「2022 - 2023年度觀塘區巴士路線計劃」諮詢文件中,有建議喺2023年落實4條新嘅往來巴士路線;「安達臣道石礦場RS-1用地公營房屋發展計劃」中顯示,未來該區將會建設小學、中學、警署、消防區、室內運動場及人工蓄水湖等社區設施等,但計劃係失望而回定係喜出望外都係未知之數,買家都要有做開荒牛嘅準備。


最易入手、九龍區搶手之選:啟德啟欣苑

啟德啟欣苑預計2024年年尾落成,分為兩座住宅大廈,共提供1840個單位,實用面積為186至448呎,由於呎數範圍較大,係新一輪居屋計劃中最易入手嘅屋苑,入場費約124萬。 啟德區係新發展地區,無論係市建局資助房屋煥然壹居、區內首個私樓住宅項目嘅啟德一號、定再之後嘅嘉匯、龍譽、天寰,推出市場後都十分受歡迎,完善嘅生活配套係指日可待。啟欣苑同時佔盡屯馬線及名校區嘅優勢,距離啟欣苑最近嘅地鐵站出口係宋皇臺站A出口,一出地面隔離就係㗎喇,而如果想去啟德站,步行亦只需約十分鐘;啟欣苑預計屬於34校網,覆蓋何文田、土瓜灣、馬頭角、啟德一帶,中學校網就預料屬於九龍城區,一共有35間中學,包括喇沙書院、瑪利諾、拔萃等傳統名校。預計除咗北角驥華苑,啟欣苑會係最搶手嘅選擇。


新一代居屋王:北角驥華苑

北角驥華苑預計2024年年尾落成,超級限量地只提供248個單位,面積介乎280至457呎,售價由248至531萬,平均呎價達HK$9,950,係同期最貴嘅新居屋,最主要原因係呢個屋苑就喺正超級豪宅海璇隔離,特別係樓盤以東北嘅方向,可以望到維港景色、啟德跑道區及觀塘避風塘。當然,驥華苑嘅地理位置都唔會令人失望,距離北角站A1出口只有200米嘅路程,而行約300米就去到渣華道市政大廈,可以解決柴米油鹽嘅需要之餘,亦有室內運動場,日常生活配套方面有一定嘅分數。不過,如果買家係有養車嘅需求就要留意喇,房委會好早就表明,為咗減輕渣華道嘅道路負擔,只會預留少量住客車位,而根據規劃大綱反映,樓盤只會提供12個私家車位,亦即係接近21戶先分配到一個車位,揀樓競爭力大,估唔到車都係一位難求!

想知道更多關於居者有其屋計劃/搬屋嘅資訊?記得留意我哋嘅Facebook同Instagram啦! ------- 高永搬屋官方網站:http://bit.ly/32HNqeO 高永搬屋Instagram:http://bit.ly/2V0dlwx 線上報價/查詢:http://bit.ly/goingmoving / +852 5595 7455 (Whatsapp)

#高永搬屋 #GoingMoving #搬屋公司 #搬運公司 #搬屋 #搬寫字樓 #搬辦公室 #移民 #海外搬遷 #存倉 #搬屋吉日 #二手家私 #紙箱 #包裝物料 #執屋 #搬運 #搬屋報價 #立即報價 #搬屋收費 #居者有其屋 #居屋2022