【唐樓搬屋知多啲】入住唐樓四大地雷


租唐樓

近年越嚟越多人選擇住唐樓,呎數大樓底高,就算喺旺區都好容易搵到租金平嘅盤,係唔少初嘗搬出嚟住嘅上班族嘅首選。不過租住唐樓都有唔少地雷要注意,如果唔係分分鐘會得不償失!


同大家分析之前,首先要提一提,唐樓其實唔一定係要行樓梯,其實唐樓同洋樓最主要分別係喺地契條款上,唐樓嘅建築一般都冇間隔,而且可以商住兩用,自由去設計使用空間,而洋樓就會好似而家最主要嘅屋苑咁,已經間好晒房,而且只准用作住宅用途的。


1. 樓梯設計

全港只有少量翻新過嘅唐樓有升降機,如果係住較高嘅樓層,每日上上落落都幾講求體能,有較年長嘅屋企人同住就更加要留意。除咗日常生活,搬屋嘅時候都有唔少問題,例如大多數嘅搬屋公司都會額外收取樓梯搬運費用,平均係每層加收總單價嘅百分之十至十五,換句話說,即係住得越高、額外嘅支出就越多。另外,因為唐樓嘅樓梯本身通道同轉角位都較窄,處理大型家私嘅時候,有機會唔能夠直接原件搬運並需要拆裝;而如果家私本身唔可以拆裝,分分鐘連搬都搬唔到,就算搬到,家私都會較大機會有小碰撞/刮花。


2. 寬頻及電流

基於樓齡及設備過舊問題,較難做到光纖入屋,就算您逼於無奈俾貴幾倍錢買無限流動網絡計劃,網速都係比固網寬頻慢。雖然近年有寬頻公司推出唐樓免安裝嘅5G家居服務,但都要注意服務覆唔覆蓋到您居住嘅樓宇,而且您唔好諗住5G就好快,其實同光纖入屋寬頻,以至係最普通嘅100M寬頻,都有十倍以上嘅差別,如果您嘅工作需要高網速,隨時WFH都唔得,如果您係電競選手就更加唔駛諗喇。除此之外,香港一般嘅住宅單位供電最少有60A電流量,而舊唐樓可能只得一半。如果同時間使用多件大型電器,可能就會出現電流量不足嘅問題,需要自行同電力公司申請增加供電流量。


3. 防火防盜防偷水

唐樓係劏房嘅集中地,一旦發生火警,後果不堪設想,所以喺決定租住唐樓之前,最好親身評估一下大廈嘅防火設備足唔足夠,例如每一層嘅消防喉轆、滅火筒、火警鐘數量,及後樓梯整潔情況係唔係可接受範圍等,萬一之後真係發生火警(touchwood),都確保到有順利嘅逃生路線。如果有需要可以向消防處反映,要求跟進相關嘅安全問題。


分租單位喺唐樓都十分常見,即係大單位一個人租一間房咁合租,呢個情況一般都係共用單位嘅水電錶之後費用平均攤分;而如果您係租劏房,即係大單位細拆成幾個獨立細單位,每個細單位都會有自己嘅水電錶,入水喉污水喉都會分拆開,呢個時候就要留意水電錶安裝嘅位置係唔係合理、一戶一個,避免交多咗/交錯費用。


未住過唐樓嘅話,要有心理準備之後凡事都要自己解決,再冇物業管理公司/保安做中間人幫您處理噪音、衛生等問題。所以我哋都建議大家除咗留意上面提到兩個外在環境因素,都可以留意一下左鄰右里「合唔合眼緣」,盡量避開「問題鄰居」。最後就係要做足防盜措施,應付無保安、無大閘、無閉路電視嘅治安問題。


4. 留意劏房戶及潛建物

上面提到劏房會改動入水喉污水喉,每劏一戶都會造成額外去水量,其實咁做會令到樓宇喉管長期處於高壓狀態,如果不勝負荷,就會增加電線故障、漏電嘅機會。而唐樓另一個常見嘅非法改動就係僭建,例如露台封窗、天台屋、簷蓬等,如果日後屋宇署發現並向單位發出僭建清拆令,就算租戶唔需要負責清拆費用,都焗住要忍受清拆工程嘅滋擾。如果最壞情況係成個租住位置都屬於僭建部分嘅話,更加要即刻搵地方搬,所以租唐樓前一定要做好查冊工作,了解清楚單位有冇僭建、非法劏房等問題,保障好自己。如果你係業主嘅話,就更加要及早處理,以免被「釘契」,亦都要留意大廈是否需要大維修,因為唐樓業權少,每戶承擔嘅維修費相對較高,當然如果係自住及有經濟困難,都可以申請屋宇署嘅樓宇維修支援計劃

高永小教室 - 認識唐樓

香港嘅唐樓發展史大致可以分成四代:

第一代(19世紀):中環威靈頓街 「永和號」 - 青磚承重牆、木材樓板及橫樑、雙筒雙瓦式屋頂、 背靠側設計(即與鄰近建築背靠背、無後巷)


第二代(20年代):灣仔香港故事館「藍屋」- 木樓梯、木樓板、木天花、水泥騎樓


第三代(30年代):旺角雷生春 - 全鋼筋混凝土建造、著重裝飾性的設計


頭三代嘅共通點都係大約2-3層樓高,採用下舖上居嘅建築模式,而第四代(50年代),就係而家大家仲經常接觸到四層以上嘅唐樓喇!鋼筋混凝土建造、強調實用及功能性結合嘅現代主義設計。


想知道更多關於搬屋/搬office嘅資訊?記得留意我哋嘅Facebook同Instagram啦!

-------

高永搬屋官方網站:http://bit.ly/32HNqeO

高永搬屋Instagram:http://bit.ly/2V0dlwx

線上報價/查詢:http://bit.ly/goingmoving / +852 5595 7455 (Whatsapp)


#高永搬屋 #GoingMoving #搬屋公司 #搬運公司 #搬屋 #搬寫字樓 #移民 #海外搬遷 #存倉 #搬屋吉日 #二手家私 #唐樓 #紙箱 #包裝物料 #執屋 #搬運 #搬屋報價 #立即報價