【環保攻略】二手家私處理平台


二手家私

高永搬屋服務範疇涵蓋家居搬遷、商業搬遷、家私存倉、海外移民搬運、二手家私棄置及放售,不過由於疫情關係,二手家私嘅流動量大減,我哋暫時停止咗收購服務,但如果您嘅家私仲好新淨,只係新屋唔啱用,我哋都唔想您直接選擇付費棄置,希望您可以從唔同途徑轉讓俾有需要嘅人,幫到人之餘,亦可以一齊為減少浪費地球資源出一分力!


線上二手家私放售平台:Carousell

Carousell 旋轉拍賣係一站式嘅買賣平台,用戶只需要為放售物品影相及上傳到平台網站或手機應用程式,並適當地形容物品損耗程度、類別、呎吋等資訊,有意購買該類型產品嘅買家,透過搜尋關鍵字就會搵到您嘅商品,至於放售價錢、點樣送貨嘅細節都係自訂嘅,亦可以搵到合適買家之後再自行協商,呢個平台嘅好處係用戶年齡層面較廣,亦係比較多人使用嘅二手買賣平台,最重要嘅係,由物品刊登到成交,費用都係全免㗎! https://www.carousell.com.hk/


線上二手家私放售平台:Facebook Marketplace

Facebook入面都有唔少群組係關於二手家私買賣嘅,不過每個群組嘅參與人數都唔同,如果您唔想揀、又唔想不斷加入唔同群組重覆刊登轉售物品嘅資訊,Facebook內置嘅Marketplace就滿足到您喇,佢嘅用法同Carousell基本上係一樣,差別在於如果您已經有Facebook嘅帳戶,就唔需要再額外註冊,直接用返您原有嘅帳戶刊登及使用Facebook Messeger聯絡買家就可以,減少錯過訊息嘅機會。(不過可能有人會同高生一樣,覺得俾朋友見到賣啲咩會怕醜,我哋實測過係有隱藏刊登內容唔俾朋友知嘅功能㗎!) https://www.facebook.com/marketplace/


線下二手家私放售平台:HAPPYSHOP 大角咀二手傢俬專門店

HAPPYSHOP 提供人手消毒清潔優質二手家私,以能鼓勵重用資源為宗旨,達致真正源頭減廢。如果您嘅家私完整度高、狀態良好、屬於標準尺寸同物料,就會喺被翻新同修復之後,喺佢哋嘅二手網店重售㗎喇,如果係零件或配件就會被重用於維修用途。您只需要將唔要嘅家私圖片、吋吋、收貨地址等資料WhatsApp俾佢哋就可以獲得報價。雖然呢個平台唔係免費提供服務,但處理原件家私嘅客人只需要喺落單嘅時候選擇「環境友好」選項,就可以用訂單最終嘅收費金額換取電子現金券獎賞,之後喺佢哋旗下嘅品牌店舖內使用。每 $1000可以換取一張 $100嘅電子現金券,就算訂單內嘅物品最後冇被保留,都一樣可以申請。 https://www.happyshop.hk/


線下二手家私放售平台:執到寶二手傢俬專門店

執到寶自設車隊專門回收家私,再轉售俾有需要嘅人。只要物品唔係有損壞、污漬、發霉、回收價值低或唔能夠重用嘅家私(例如入牆款式)都屬於回收範圍之內。 您可以使用WhatsApp或電郵提供家私資料及收貨地址,合適嘅話就會派專人上門處理。運送方面,如果係由執到寶車隊全程負責,就會有相關收費,價錢按收貨地區、貨量及物品質量而定;如果只係需要安排車輛到收貨地址,由您自行將家私搬上車嘅話就毋須收費;想時間彈性啲嘅話,您亦可以選擇親自將家私送去專門店㗎。 https://54423000.com.hk/


可能您會覺得既然啲家私都唔要啦,唔需要浪費精神同時間去處理,不過其實而家線上線下嘅轉售平台咁多,出個Post或者報個價並唔會花您好多時間,反而係一個小小嘅舉動就可以幫到有需要嘅人同延續家私嘅壽命。特別係以上兩個線上二手家私放售平台,如果您唔要求收到一定嘅回報,願意免費轉讓、買家自行處理運輸問題的話,真係眨下眼就搞掂㗎喇!


想知道更多關於搬屋/搬Office嘅資訊?記得留意我哋嘅Facebook同Instagram啦! ------- 高永搬屋官方網站:http://bit.ly/32HNqeO 高永搬屋instagram:http://bit.ly/2V0dlwx 線上報價/查詢:http://bit.ly/goingmoving / +852 5595 7455 (Whatsapp)

#高永搬屋 #GoingMoving #搬屋公司 #搬運公司 #搬屋 #搬寫字樓 #移民 #移民搬屋 #空運 #海運 #船運 #國際搬運 #報關清關 #搬運 #二手家私 #存倉 #搬屋報價 #免費上門報價 #即時報價 #線上報價 HappyShop二手.翻新.訂造 Carousell 旋轉拍賣 執到寶 回收傢俬 二手傢俬