【新居入伙】雪櫃點搬好?


搬雪櫃

雪櫃可以話係每個家庭都有嘅電器,作為搬屋公司,聽得最多嘅就係「搬屋前要唔要清空雪櫃㗎?」,我哋通常會建議客人將易碎同會融水嘅物件,例如雞蛋、玻璃、杯碟、冰塊等拎出嚟,其他食物、紙包飲品等就可以留喺雪櫃一次過搬走。其實最好就係盡量將雪櫃每一格都塞滿,咁樣搬運時入面嘅嘢就唔會郁嚟郁去,減少撞爛嘅機會。


不過既然都係要執得整整齊齊,不如喺幫屋企斷捨離嘅同時,都幫屋企個雪櫃做返次大掃除啦!首先,將雪櫃入面嘅物品拎晒出嚟先,冷藏食品可以存放喺保溫箱或者保溫袋入面,過程中可以順便檢查埋食品嘅到期日同狀態,有異樣就扔咗佢唔好留戀喇。之後,記得記得截斷電源先!例如拔插蘇,避免清潔過程中接觸到電源而觸電。開始清潔雪櫃就可以分為表面同內籠兩部分,表面剩係需要用濕布輕輕咁抹,如果有油漬,可以沾少少稀釋咗嘅洗潔精水。而內籠因為會接觸到食物表面,所以都唔建議用有化學物質嘅清潔劑,檸檬水、梳打粉、白醋等天然清潔材料就最為理想喇。準備好另一條抹布,沾上清潔水後就可以由高至低咁抹,要留意嘅係,大家可能都會習慣用熱水去油污,但由於雪櫃層板大多數都係塑膠料,所以最好都係用返室溫水或者暖水就夠喇。如果真係有頑強嘅污漬,可以試吓用醋加水,或者用梳打粉加鹽,再加少量水攪拌成膏狀,一樣有去污同埋殺菌效果㗎。抹晒成個雪櫃內籠之後,就可以用一份白醋、五份水嘅比例開成醋水,再噴喺雪櫃嘅唔同角落,之後閂埋門等15分鐘,有需要就再用布抹乾,完成最後嘅消毒除臭步驟。


既然要做就要做得徹底!雪櫃同冷氣機一樣,都有通風位置(通風柵),用微型吸塵器或者牙刷掃走塵埃就內內外外、上上下下都乾淨晒喇!雖然雪櫃長期都係維持喺4度以下,但低溫環境只係可以減慢細菌繁殖率,係唔能夠殺菌㗎,除咗平時大家會好關注雪櫃有異味嘅話,可以用咖啡粉、檸檬片、茶葉等天然材料辟味,最好就跟上面嘅步驟,定期清潔雪櫃,避免「禍從口入」!

想知道更多關於搬屋/搬Office嘅資訊?記得留意我哋嘅Facebook同Instagram啦! ------- 高永搬屋官方網站:http://bit.ly/32HNqeO 高永搬屋instagram:http://bit.ly/2V0dlwx 線上報價/查詢:http://bit.ly/goingmoving / +852 5595 7455 (Whatsapp)

#GoingMoving #搬屋公司 #搬運公司 #搬屋 #搬寫字樓 #移民 #移民搬屋 #空運 #海運 #船運 #國際搬運 #報關清關 #搬運 #二手家私 #存倉 #搬屋報價 #免費上門報價 #即時報價 #線上報價 #家居清潔 #搬雪櫃