【搬屋攻略】新屋冷氣機有異味點算好?即教您清潔四步曲!


洗冷氣


就嚟食五月糭,意味住冬天衫ByeBye,冷氣機Standby!太耐冇開冷氣,點解一開機有好大陣「嗡味」,搞到鼻敏感之餘仲開極都唔涼?可能係機內積聚咗太多灰塵微粒,令到機件嘅製冷效果變差,就會開咗等於冇開咁,勉強繼續調高冷氣強度,唔單止電費好襟計,仲有機會令冷氣機嘅壽命下降!有預算搵專業嘅清潔公司/冷氣師傅深層清潔內攏緊係好啦,但如果情況唔嚴重,又想慳慳哋試吓自己解唔解決到嘅話,就繼續聽高生講落去啦!


第一步:截斷電源

清洗任何電器都係,保護好自己,一定要熄咗電掣先開始呀!因為過程中一定會接觸到水源,避免發生觸電意外,亦都防止加速機件損耗,如果您部冷氣機冇電掣開關,剩係得遙控器,咁最好就係直接喺電箱斷電喇(熄保險絲Fuse)。


第二步:拆開隔塵網沖水

隔塵網就好似係先頭部隊咁,盡量隔住空氣入面嘅污糟嘢,而因為佢係最接近冷氣出風口嘅一層,所以佢比起其他零件,係最容易見到塵垢,但亦都係最容易清洗嘅。無論您係窗口式定分體式,只要將冷氣機外殼打開(視乎型號準備螺絲批),再將黑色嘅濾網沿住卡位推開就可以輕鬆拆落嚟㗎喇,之後就可以拎去廁所沖水,有需要可以用唔要嘅牙刷刷走窿窿罅罅嘅塵埃,清潔劑就唔駛喇,因為大多數過濾網都係膠製品,避免揦到變形,用清水沖乾淨之後等佢自然風乾就可以。


第三步:用清潔劑清潔蒸發器

拎走咗隔塵網就會見到冷氣機嘅蒸發器(凍Coil),可以用油掃掃走明顯嘅灰塵,然後均勻地噴上冷氣機泡沫清潔劑(五金舖就買到),泡沫會將大大小小嘅污糟嘢逼出嚟,等多十幾分鐘,佢哋就會自行溶解,呢個時候再用噴壺將清水噴喺蒸發器上面,污水就會經冷氣機去水喉排走。


第四步:靜候三十分鐘

喺等待機內零件乾爽返嘅同時,可以準備濕布同乾布抹一抹機身,沖乾淨涼冇理由著返污糟衫㗎嘛。一齊準備就緒就可以組裝返部冷氣機,大功告成!


其實無論冷氣機有冇出現明顯「病癥」,最好都一年兩次清潔一吓,例如夏天完結唔駛再開冷氣同準備迎接夏天前,都係清潔嘅好時機。除咗以上提及過嘅部分,其他零件都會積住污垢,不過大家要量力而為,特別係藏得比較深嘅壓縮機(製冷過程最主要嘅零件)同室外嘅散熱器,如果能力範圍內清潔完情況都係冇改善,就搵專業嘅清潔師傅求助啦!


最後都提一提,好多客人搬屋時都會問,可唔可以搬冷氣機,呢個問題要視乎客人嘅冷氣款式而定,一般嚟講,由於分體式冷氣好多時候都涉及搭棚工作,所以高永嘅團隊係未能夠提供呢項服務嘅,但窗口式冷氣就可以幫到您喇。


想知道更多有關搬屋/家居清潔嘅資訊,記得Follow我哋嘅Facebook同Instagram啦!

-------⠀

高永搬屋官方網站:http://bit.ly/32HNqeO

高永搬屋Instagram:http://bit.ly/2V0dlwx

線上報價/查詢:http://bit.ly/goingmoving / +852 5595 7455 (Whatsapp)⠀


#GoingMoving #搬屋公司 #搬運公司 #搬屋 #搬寫字樓 #移民 #移民搬屋 #空運 #海運 #船運 #國際搬運 #報關清關 #搬運 #二手家私 #存倉 #搬屋報價 #免費上門報價 #即時報價 #線上報價 # #避風港政策 #洗冷氣 #夏天