【搬屋收費】七大臨場加價陷阱


搬屋收費

關於搬屋收費,高生之前都有分享過「五招避免搬屋中伏」、「正常家庭搬屋要幾錢」等攻略,作為搬屋界熱門話題,今日就同大家整理咗「七大搬屋隱藏收費位」,只要大家喺報價時同搬屋公司溝通好以下位置,就可以完美避開臨場加價嘅陷阱!


搬屋臨場加價陷阱:貨車停泊位置

無論係大廈定村屋,只要搬屋公司嘅貨車唔能夠泊到門口,師傅要推一段路先可以到達目的地嘅話,搬屋公司就會加收附加費,一般會以50米或100米計算,如果係村屋嘅話,通常路面情況會再複雜啲,例如推遠路之餘再有梯級、斜坡等,建議您可以直接拍片俾搬屋公司睇,以免到時有咩爭拗。雖然大多數屋苑都有車場可以俾貨車泊入去,但如果您嘅座數係需要轉電梯、轉平台的話,一樣要話俾搬屋公司知。 順帶一提,即使您只係同一個屋苑內搬運,一樣要了解清楚貨車可以停泊嘅位置,因為師傅同搬運工具會係跟車過嚟幫您,就算搬運物品唔駛上車都好,我哋都係要「出車」㗎。


搬屋臨場加價陷阱:樓梯搬運層數

住唐樓嘅朋友就會比較清楚,搬屋公司會因應要行幾多層樓梯而加收搬運費用,但其實就算您係住有電梯嘅大廈,只係大堂到𨋢有一層樓梯,甚至係大堂門口有幾小級,都要報俾搬屋公司知道!如果只係兩三級,由搬屋公司判斷可以用「搭板」方式搬運嘅話,大多數都可以免收附加費,但如果唔可以,就要睇返該公司對樓梯收費嘅標準,例如會以一層一個固定嘅百分比嚟計算,即係一層加收15%,三層就會係用總單價乘以1.45咁收費,及早同搬屋公司交代清楚,就可以有個好啲嘅預算。


搬屋臨場加價陷阱:公眾假期或特別時間搬屋

部分搬屋公司設有平日及週末或公眾假期兩種收費模式,有指定需要嘅朋友就要事前問清楚喇,不過不厭其煩地提提大家,我哋高永係劃一收費㗎,只係紅日會較旺,比平日快Full Booking,如果有心水日子嘅就最好盡早同我哋聯絡喇。而時間方面,大多數搬屋公司嘅正常服務時間係早上九點至下午五點,如果要求再早啲或者晚上搬屋,就要睇吓安唔安排到,同埋會有額外收費,始終都要出返OT錢俾師傅嘛!


搬屋臨場加價陷阱:包裝物料費用

視乎您揀嘅搬屋公司係屬於邊種收費模式(詳情請閱【搬屋收費】點解間間搬屋公司收費咁唔同?一文全面拆解搬屋公司嘅計價方式!),如果係好似高永搬屋咁,一個Lump Sum綜合報價嘅話,大多數都係會包埋所需要嘅紙箱及提供適量嘅膠紙,而如果係逐件搬運物品計算嘅公司,包裝物料就會係額外買幾多再計幾多錢,例如紙箱大約係港幣$10-$15左右。呢到都提提大家,高永團隊係會免費派送物料到您府上㗎!不過由於運送成本及考慮到同事工作量嘅問題,配送服務只會免費提供一次,如果係有額外物料嘅需要,例如Bubble紙又或者係想要多啲紙箱做Spare,就可以預先同我哋講定,一次過滿足您嘅需要。


搬屋臨場加價陷阱:家私需要拆裝或吊運

正常情況下,搬屋公司喺望到您嘅家私款式之後,就會知道嗰件家私需唔需要拆裝,亦會喺報價時講明已包括拆裝費用,如果您居住嘅單位存在住一啲搬屋公司未必會了解得好清楚嘅資訊,例如房門較窄、大廈電梯較細等,就有可能影響到本身唔需要拆裝嘅家私都需要拆裝嘅機會,呢種情況下就會建議您預早同搬屋公司講定,先了解咗額外收費係幾多,再由到時現場嘅師傅決定,由於拆裝需時,亦需要特別嘅工具同功夫,所以家私可以就咁搬嘅話師傅都唔會夾硬幫您進行拆裝。至於搬村屋嘅話,就要更加留意樓梯位置有冇足夠嘅空間搬運家私,特別係轉角位,如果唔係就要用吊車或者人手吊運經露台搬入單位,咁就會無可避免嘅額外收費喇。


搬屋臨場加價陷阱:棄置家私或雜物

好多人都會以為扔一兩件嘢,師傅會拍硬檔幫手扔埋,甚至有啲本身係搬嘅物品,轉為棄置嘅話應該可以減返收費,但其實搬屋公司處理棄置家私或雜物,一般嚟講都唔可以就咁扔返喺屋苑範圍,而係要搬上貨車,再運送到政府垃圾收集站或中轉站付費棄置㗎,所以我哋會建議喺報價嘅時候,一樣提供棄置物品嘅照片同數量,方便大家預算費用及搬運時間。


搬屋臨場加價陷阱:隧道費、停車場收費、小費

大多數搬屋公司嘅報價都係未包括隧道費及停車場收費嘅,因為當日要行邊條隧道會係根據當時嘅交通情況而定,我哋亦冇辦法百分百準確計算整個搬運流程需要花幾多時間、要泊車場幾耐,所以以上兩項收費都會係實報實銷。至於小費,一般較有規模嘅搬屋公司都會考慮到公司形象,會規定同事唔可以主動要求小費,當然如果師傅嘅表現係值得嘉許嘅,您想俾小費我哋都係無任歡迎啦!

- 想知道更多關於搬屋/搬Office嘅資訊?記得留意我哋嘅Facebook同Instagram啦! ------- 高永搬屋官方網站:http://bit.ly/32HNqeO 高永搬屋instagram:http://bit.ly/2V0dlwx 線上報價/查詢:http://bit.ly/goingmoving / +852 5595 7455 (Whatsapp)

#高永搬屋 #GoingMoving #搬屋公司 #搬運公司 #搬屋 #搬寫字樓 #移民 #移民搬屋 #空運 #海運 #船運 #國際搬運 #搬運 #二手家私 #存倉 #搬屋報價 #免費上門報價 #即時報價 #線上報價 #搬屋收費



最新文章

查看全部