【打風季節】玻璃門窗要黐膠紙?


打風措施

熱咗咁多日,聽聞今日開始就會連落幾日雨,而歐洲中期天氣預報中心(ECMWF)預測,星期日將會有一個低壓區於南海南面生成,預料向北移動,並於星期二最接近本港,即係…又打風喇!香港天文台成日都呼籲市民喺八號烈風或暴風信號生效時,應該加貼膠紙喺當風嘅大玻璃窗上面,減少玻璃破裂時所引致嘅損傷,甚至幾年前山竹襲港仲出現膠紙搶購潮,但美國國家海洋及大氣管理局(National Oceanic and Atmospheric Administration, NOAA) 喺網頁入面謬誤嘅分欄到,就直指呢項舉動係浪費力氣、時間及膠紙(It is a waste of effort, time, and tape),究竟之後打風仲黐唔黐「米字」好呢?


首先我哋要知道點解玻璃窗會有被風吹裂嘅風險。當一塊玻璃面積較大嘅時候,受力點會唔平均,如果風力集中喺一點,玻璃就有機會承受唔住力度而碎裂。所以喺大型玻璃上面以「交叉」或者「格仔」形式黐上膠紙,最緊要係覆蓋到玻璃最脆弱嘅正中心位置,就可以分散風力嘅同時,減少玻璃震盪,好似有嘢傍住塊玻璃咁。


不過其實現實中,一般住宅嘅窗戶面積唔大,大多數可能都再有鋁框加固,受力就會比較平均,而且有一定嘅厚度,較少會因為風力而吹裂玻璃,反而可能會被烈風吹起街上嘅雜物、沙石等擊中窗戶而導致玻璃碎裂,所以就算黐咗膠紙,都無法避免被硬物擊中而導致爛玻璃嘅情況發生。不過有黐點都會好啲,因為膠紙可以將裂開嘅玻璃固定,避免裂痕加大之餘,亦可以將碎咗嘅玻璃黏住,避免玻璃碎飛濺到屋內或者樓下嘅途人,盡量減低傷害。


而如果您係想幫公司、商戶或者係大廈大門做防風措施,就要首先了解嗰到嘅門窗係唔係屬於強化玻璃,因為強化玻璃嘅設計本身就有考慮到受到撞擊之後,會自動碎裂成顆粒狀,就算跌落嚟都唔會好似普通玻璃咁鋒利,造成太大嘅傷害。如果額外黐上膠紙,唔單止唔可以黐住啲玻璃碎,仲會令玻璃一大片咁跌落嚟,發揮唔到原本強化玻璃嘅保護功能。


總括嚟講,黐玻璃未必可以保證塊窗嘅玻璃唔會爛,但就可以減少到不幸爆玻璃嘅時候所帶嚟嘅傷害性。其實黐玻璃都係買個保險啫,不過搣完膠紙最頭痕嘅莫過於留落嚟嘅膠紙漬喇,之前高生都有分享過,松節水或者白電油係最常用同最有效嘅方法之一,先用毛巾沾上適量嘅松節水或白電油, 再慢慢將膠紙漬抹走就可以。又或者係用膠漬清潔劑,例如3M就有款除膠去污噴劑(用WD-40都得),用法都係噴落啲膠漬度,然後再抹走就得㗎喇。坊間仲有啲用潤膚膏、BB油之類嘅偏方,都可以喺唔當眼位置試吓啱唔啱用。

-

想知道更多關於搬屋/搬Office嘅資訊?記得留意我哋嘅Facebook同Instagram啦! ------- 高永搬屋官方網站:http://bit.ly/32HNqeO 高永搬屋instagram:http://bit.ly/2V0dlwx 線上報價/查詢:http://bit.ly/goingmoving / +852 5595 7455 (Whatsapp)

#高永搬屋 #GoingMoving #搬屋公司 #搬運公司 #搬屋 #搬寫字樓 #移民 #移民搬屋 #空運 #海運 #船運 #國際搬運 #報關清關 #搬運 #二手家私 #存倉 #搬屋報價 #免費上門報價 #即時報價 #線上報價 #打風