【綠置居2022】
新一期「出售綠表置居計劃（綠置居）單位2022」後日就開始接受申請！由9月29日起至到10月12日晚上7時，有意購入粉嶺清濤苑、油塘高宏苑及馬鞍山錦柏苑3個新發展項目嘅您記得把握呢次以市價41折發售嘅機會喇。至於未係好了解咩係綠置居、唔肯定自己符唔符合申請資格嘅話，我哋一齊嚟睇吓高生有咩講啦！
咩係綠置居
綠置居全名係「綠表置居計劃」，即係政府每年都會將一定嘅新公屋項目，以買賣方式售予合資格人士，由於申請表格係綠色，所有就叫綠置居喇。綠表申請人必須符合一定資格，簡單嚟講主要對象就係現居於公屋住戶及合資格嘅公屋申請人，旨在協助綠表申請者自置居所，從而騰出更多公屋單位，縮短公屋輪侯時間，亦因為咁，綠置居項目嘅售價會設定為公屋住戶嘅消費水平，首期分分鐘只需要數萬蚊。
綠置居申請資格
1. 通過詳細資格審查並獲核實為符合入住公屋資格的公屋申請者
2. 房委會及房協轄下之公屋住戶，但不包括「有條件租約」的住戶
3. 獲核實符合「公務員公共房屋配額」或「為初級公務員提供一次過公共房屋特別編配」申請資格的人士
4. 受政府清拆計劃或天災影響，獲核實符合資格入住公屋的人士
5. 離婚／分戶，並獲核實符合資格入住公屋的公屋住戶
6. 持有房屋署簽發有效《保證書》並獲核實符合資格入住公屋的前公屋住戶
以下人士不合資格：
1. 透過房委或房協「特快編配計劃」獲配單位，而租約生效日期未滿 3 年
2. 以按月暫准租用證形式租住房委或房協過渡性暫租住屋單位
3. 房委會有條件租約住戶
4. 房協乙類出租屋邨住戶
綠置居揀樓次序
綠置居揀樓次序同居屋一樣，會按電腦攪珠結果隨機排列，其中再根據申請人嘅類別而定（房委會預計綠置居2022會喺今年第四季進行攪珠，並於2023年第一季開始按申請類別嘅優先次序邀請合資格申請者揀樓）。
所有家庭及一人申請者都會獲發一個基本揀樓次序，而參加咗「家有長者優先選樓計劃」嘅家庭申請者，會額外獲發同一個類別嘅揀樓次序，因為政府為呢類申請者預留咗大約30%配額，即係話合資格嘅申請人分別會有基本「家庭」申請者揀樓次序及一個「家有長者優先選樓計劃」揀樓次序，總共2次機會。
綠置居2022
按照現行定價機制，綠置居單位嘅折扣率會較上一次居屋銷售計劃嘅折扣率高10%。根據「居屋2022」最終折扣率49%計算，「綠置居2022」新單位售價按最終折扣率評定為市值嘅41折。單位售價由75萬至271萬不等，如果以綠表買家需要支付5%首期計算，最平大約$40,000首期就可以上車。
綠置居2022總共推出3個屋苑、合共4,693個單位： 1. 粉嶺清濤苑： 776個單位，實用面積約277平方呎至約447平方呎，呎價為$4,490
2. 油塘高宏苑
2,021個單位，實用面積約185平方呎至約489平方呎，呎價為$5,410
3. 馬鞍山錦柏苑
1,896個單位，實用面積約184平方呎至約473平方呎，呎價為$5,030
綠置居申請方法
綠置居接受以網上、親身或郵寄形式遞交申請。由2022年9月22日開始，申請人可於房委會或房屋署網頁下載「綠置居2022」申請表、申請須知及3個發展項目嘅售樓資料簡介。亦可於辦公時間前往觀塘建生廣場一樓嘅房委會綠置居售樓處（可前往參觀綠置居單位間隔模型）、樂富房委會客戶服務中心、房委會轄下各屋邨辦事處及分區租約事務管理處、香港房屋協會（房協）轄下各出租屋邨辦事處及民政事務總署的民政諮詢中心索取上述表格嘅紙本文件；申請費用為$250。
如果您係選擇網上申請，所屬屋邨辦事處職員喺收到您嘅網上申請後就會同您聯絡及核實住戶資料，申請者及所有年滿18歲或以上嘅家庭成員，都需要簽署一份由所屬屋邨辦事處備妥嘅申請表格文本，再交俾有關屋邨辦事處以作跟進。
而如果您係選擇親身或郵寄遞交，唔同類別嘅申請人都有唔同嘅遞交方法： 1. 公屋住戶
交到所屬屋邨辦事處／租約事務管理處核實資格，該處會轉交予綠置居銷售小組
2. 房協出租屋住戶
交到所屬出租屋邨辦事處核實資格， 待屋邨辦事處於申請表加簽後，申請者需將表格交到綠置居銷售小組 ﹙地址：觀塘開源道 33 號建生廣場 1 樓﹚
3. 「長者租金津貼計劃」受惠者
交到香港房屋委員會客務中心第二層平台申請分組「長者租金津貼計劃」專責小組
記住記住，無論您係透過邊種方式申請、屬於邊一個申請類別，任何人士只能夠遞交一份申請表，否則會被視作重複申請，喺整個認購過程中一經發現，不論任何原因，所有申請一律作廢，交咗嘅費用都係唔會獲得退還，特別係如果申請人同期亦申請咗居屋，並於申請時已剔選保留申請至下一個資助出售單位銷售計劃，係唔需要再次遞交申請綠置居及支付申請費用㗎。
綠表白表您要知
「00、47、08、11、29、16、09、72、64、36」中咗？中咗！唔係六合彩，而係2022年居者有其屋計劃攪珠結果出爐喇！如果您嘅申請書編號最後兩位數係以上嘅兩位數字，「00」代表您屬於排第一嘅揀樓组別，如此類推。有人話就算抽中咗都唔代表您一定揀到樓，但排得後又唔一定冇機會喎，甚至係錯過咗今年嘅申請時間，又或者係想下年第一次嘗試申請嘅話，有啲咩注意事項？有興趣了解更多居屋計劃嘅就一齊睇落去啦！
居者有其屋計劃
呢個係政府嘅資助出售房屋政策之一，等市民可以低於市價價錢，購買由房委會興建或私人機構參建嘅居屋。近年出售嘅居屋項目大多以市價大約六至七折定價，例如2022年以市價五一折發售，但要留意嘅係折扣率會因應推盤時嘅市況而異。
綠表白表分別 居屋計劃分「綠表」、「白表」兩條大隊： 如果您係以下類別人士，就可以以綠表申請（無入息限額）： (A) 房委會或房協公屋嘅住戶（有條件租約住戶除外） (B) 持有房屋署或市區重建局發出有效《綠表資格證明書》嘅人士 (C) 持有由房屋署簽發有效保證書嘅房屋署屋宇事務助理職系人員 (D) 房委會長者租金津貼計劃嘅受惠者
如果您係以下類別人士，就可以以白表申請（需符合入息上限及資產限額*）： (A) 私營房屋住戶 (B) 房委會及房協轄下公屋或資助房屋住戶嘅家庭成員 (C) 透過房委會租置計劃，與房委會簽訂轉讓契據日期起計10年內嘅租置計劃單位業主及其認可家庭成員，可以家庭整體形式申請，申請人須喺簽署居屋單位買賣協議當日起計3個月內，或喺房委會特准一次過延期嘅三個月期限內，將現居租置計劃單位出售及完成簽訂單位轉讓契據手續 *1人申請者 入息限額為HK$33,000；總資產淨值限額為HK$92.5萬 2人或以上家庭申請者 入息限額為HK$$66,000；總資產淨值限額為HK$185萬
每次居屋計劃推出嘅單位，都會以特定比例分配綠表及白表申請者。今次，綠白表比例為40（綠）：60（白）。房委會表示，今期居屋一共收到大約25.2萬份申請表，以今期新居屋推售嘅8,926個單位計算，超額27倍，大約每28人爭一個單位。當中，白表申請約佔20.3萬份，家庭申請佔四成，剩低嘅屬於一人申請。而4.9萬份綠表申請入面，家庭申請佔八成，其餘都係一人申請。
居屋申請類別
以上十組數字代表十個組別，而喺同一組別內嘅申請者，係會以申請類別及電腦排序，再決定居屋揀樓次序。以綠表為例，最先揀樓嘅類別會係受房委會公屋清拆計劃影響嘅家庭申請者，之後係參加「家有長者優先選樓計劃」嘅核心家庭申請者、其他家庭申請者、受房委會公屋清拆計劃影響嘅一人申請者，最後就係一人申請者。而白表去除受房委會公屋清拆計劃影響嘅類別，首先會係由參加「家有長者優先選樓計劃」嘅核心家庭申請者揀樓，呢個組別有多一個優勢就係，如果喺呢個階段未能揀選心水單位，仲可以循其他核心家庭申請者再揀多一次，變相係一表兩抽，呢兩個階段過咗之後，就到非核心家庭申請者同埋一人申請者喇。根據統計，除咗白表家有長者家庭申請者一定有得揀之外，其他組別都唔係100％可以獲邀揀樓。當中最難揀到樓嘅組別莫過於白表一人申請者，因為呢個組別嘅申請宗數超過十二萬宗，但只有五百四十個單位可以選購。不過申請者抽到較後嘅號碼又否一定揀不到樓？公屋聯會總幹事招國偉就話，一般嚟講，唔會所有申請者都到場揀樓，所以較後號碼嘅申請者都仲係有機會嘅。
房委會預計將會於今年第四季開始，按申請類別嘅優先次序，分批發信邀請合資格嘅申請者到樂富房委會客戶服務中心選購新居屋單位。今次推售嘅七個屋苑，市區佔四個（北角驥華苑、啟德啟欣苑、觀塘安秀苑、土瓜灣冠山苑）、新界及離島共佔三個（將軍澳昭明苑、東涌裕雅苑、沙田愉德苑）。下一篇就會同大家探討吓呢七個屋苑嘅優劣，為揀樓做足準備！
想知道更多關於居者有其屋計劃/搬屋嘅資訊？記得留意我哋嘅Facebook同Instagram啦！ ------- 高永搬屋官方網站：http://bit.ly/32HNqeO 高永搬屋Instagram：http://bit.ly/2V0dlwx 線上報價/查詢：http://bit.ly/goingmoving / +852 5595 7455 (Whatsapp)
#高永搬屋 #GoingMoving #搬屋公司 #搬運公司 #搬屋 #搬寫字樓 #搬辦公室 #移民 #海外搬遷 #存倉 #搬屋吉日 #二手家私 #紙箱 #包裝物料 #執屋 #搬運 #搬屋報價 #立即報價 #搬屋收費 #居者有其屋 #居屋2022