【家居清潔小貼士】日本清潔達人教您對付四大難搞物品


家居清潔

要扚起心肝清潔屋企係難,要徹底清潔埋啲又油又多漬嘅物品或地方更加係難上加難!雖然網上面都有好多隱世秘笈教您家居清潔小貼士,例如用梳打粉加熱水對付油漬、用白醋加水1:1當空氣噴霧可以去除異味等,但呢啲錦囊永遠都唔會嫌多,今次高生就想同大家分享一個日本電視節目《見習家務男》(家事ヤロウ!!!),入面講解咗幾個實用嘅清潔貼士,仲有根有據,咁就唔驚試完好多種方法都見唔到效果啦!


家居清潔小貼士:清潔雪平鍋

雪平鍋起源於日本,表面有凹凸雪花紋,加上兩邊有鍋嘴設計,又有手柄及鍋體厚度輕薄,方便倒湯之餘,亦適合用於煮、煎、炸食物,係近年大受歡迎嘅煮食用具之一。但係佢同另一熱潮易潔鑊一樣,都係出名難清洗,原因係唔可以用百潔布「省」乾淨,因為大多數雪平鍋都係鋁製(都係銅製及不鏽鋼製),一「省」就會刮花,如果係煮酸性嘅食物,更加可能會煮完就出現離奇嘅黑色污跡。節目入面就解釋,呢啲黑色嘅污跡係屬於鹼性,所以要用酸性物質清潔,蜜柑罐頭嘅汁就適合不過喇(香港人可能比較少食蜜柑罐頭,但相信原理係靠酸性成分嘅汁液達到去除污潰嘅效果)。做法好簡單,首先將罐頭汁倒入雪平鍋,將有黑色污跡嘅部分都遮蓋住,唔夠汁而又增加分量嘅話,加水稀釋都可以,然後將蜜柑汁煮滾,15分鐘之後就可以用水冲洗,雪平鍋就會變返新嘅一樣!


家居清潔小貼士:清潔玻璃窗

現今世代要抹玻璃窗,好多人第一時間就諗到用報紙或者直接買玻璃清潔劑,但節目提到,冇玻璃清潔劑嘅年代,大家會喺抹玻璃窗嘅毛巾加入白蘿蔔根部嘅汁液,因為呢種食物含有澱粉酶,有清潔同漂白嘅效果,所以可以令玻璃上面嘅污漬更加容易被清走,節目亦講到,原來市面上好多衣服清潔劑都有加入澱粉酶呢種成分㗎。

家居清潔小貼士:清潔茶杯茶漬 茶杯之所以有茶漬,係因為茶入面含有兒茶素,同水嘅金屬離子結合之後,就會產生難以清洗嘅污漬,一開始可能唔多覺,但隨住使用時間越長,就會夾雜住更多自來水嘅鈣,令到污漬更加難洗走。唔想隻杯黃黃啡啡咁醜怪,就可以試吓節目介紹嘅方法,就係用粗鹽,只要將鹽放喺杯入面,然後用濕海綿用力「省」,鹽就好似抛光粉咁,將茶漬洗走之外,杯內仲會立立靚!


家居清潔小貼士:清潔抽油煙機隔塵網

高生成日都覺得,煮飯用過幾多油,抽油煙機就會有幾油,而呢個地方亦係最多家庭主婦最想避開、但無奈都係要清潔嘅位置,因為唔定期清乾淨,隔塵網就會越積越多污垢,見到都唔開胃。節目就介紹只要用洗衣粉同暖水(200g:1000ml),將混合物不斷攪拌至完全溶化嘅狀態,然後將鮑魚刷浸泡喺洗衣粉水入面,再刷洗隔塵網就可以去除頑固油漬。唔洗再帶手套同油漬親密接觸,相信對眾多家庭主婦嚟講係一個天大嘅福音!

- 想知道更多關於搬屋/搬Office嘅資訊?記得留意我哋嘅Facebook同Instagram啦! ------- 高永搬屋官方網站:http://bit.ly/32HNqeO 高永搬屋instagram:http://bit.ly/2V0dlwx 線上報價/查詢:http://bit.ly/goingmoving / +852 5595 7455 (Whatsapp)

#高永搬屋 #GoingMoving #搬屋公司 #搬屋報價 #家居清潔