幾個月前高生好詳細咁講解咗紙箱嘅構造、唔同厚度嘅紙箱分別有咩用途等等，今日適逢我哋換咗新嘅供應商，就再同大家重溫一吓呢個升級版嘅紙箱有咩咁特別啦！
一般紙箱分為E坑、單坑、雙坑同埋三坑四種類型，E坑最薄，亦即係坊間所講嘅單坑薄料，只有1.5mm厚，多數會係當做間隔用嘅紙皮；單坑即係有面紙、底紙、中間夾住一層波浪紋嘅芯紙，總共有三層，有大約3-5mm厚，正常情況下單坑紙箱已經可以用嚟搬生果或者搬屋㗎喇；雙坑聽個名就知即係單坑嘅兩倍，因為有兩層芯紙，總共有五層，所以有大約8mm厚，保護性更強，可以用嚟保護大型物品，減低碰撞嘅損害；三坑有三層芯紙，總共有七層，一般用嚟搬五金類等較重嘅物品先會用得著。
一個紙箱嘅品質好壞，當然係睇佢能唔能夠提供足夠嘅承托力同保護力啦，層數同厚度固然係影響因素，但其實每一層嘅紙質都好重要㗎！紙箱會用到嘅瓦楞紙分為A、B、C三個大等級，而較專業嘅術語會用A=A、A=B等去形容每層瓦楞紙嘅結構，呢到用到嘅「=」符號唔係解作等於，係芯紙嘅圖像，所以A=B即係代表面紙嘅紙質係A級、底紙嘅紙質係B級喇。
講咗咁多，係時候隆重介紹，高永搬屋嘅紙箱已經全面升級，由使用A=B嘅雙坑紙箱提升到A=A+嘅雙坑紙箱喇！意味住紙質更好、紙箱更厚實，特別係而家雨季濕濕𣲷𣲷嘅天氣，唔駛再擔心啲紙箱容易變腍同變形喇。雖然送紙箱嘅同事、負責搬運嘅前線師傅會辛苦咗，但可以為您哋嘅物品提供更高嘅保護性、令大家搬得更安心，都係值得㗎！
不過大家都要留意返，再優質嘅紙箱，我哋都係唔建議放超過25kg嘅物品㗎（放心，我哋唔會拎個磅去計，只要係大家都唔太困難地搬得起，正常都係安全範圍之內），主要係怕太重會有機會令黐埋紙箱嘅膠紙爆開，亦都有機會會整傷搬運嘅人，始終安全至上！
Comentarios